منتديات الجلفة لكل الجزائريين و العرب - عرض مشاركة واحدة - موضوع مميز [ حكايتي مع الزمان... ] أسمحولي حاب نفرغ قلبي
عرض مشاركة واحدة
قديم 2014-12-22, 22:12   رقم المشاركة : 27
معلومات العضو
بيلسان91
عضو مميّز
 
الصورة الرمزية بيلسان91
 

 

 
إحصائية العضو










B11

اقتباس:
المشاركة الأصلية كتبت بواسطة mouadezzine مشاهدة المشاركة
السلام عليكم
قبل ما نبدا في حكايتي وتفاصيلها نحب نخبركم أن الموضوع متجدد
في كل مرّة نحط فصل من فصول حياتي
فانتظروني


هاذي مدّة من نهار خرجت من الليسي lycée وانا قلبي معمّر وراسي مدمّر، وما صبتش لمّن نبكي أو نشتكي. والحمدلله لقيت هذا المنتدى، ولقيت ناس ضراف ومتفهمين كيفكم، علابيها حاب نفتحلكم قلبي، ونحكيلكم عن يومياتي وروتينها. في الحقيقة أنا أيامي كلها تتشابه، و tellement عايش نفس الروتين أصبحتْ ما نفرقش بين الجمعة والسبت وبين نوفمبر وديسمبر...نفس البرنامج نطبقو يوميا وبشكل دقيق. شحال من مرة نفكّر في الحرقة، ونبدّل رايي في آخر مرة، علاه؟ لأن الوالدة عجوز كبيرة وغير أنا وليدها الوحيد اللّي خدّام عليها. يمّا مريضة ونخاف نحرق للطاليان يزيد عليها الحال وتروح فيها، ونبقى حياتي قاع وانا نادم.
Donc راني صابر، ونستنى كاش نهار ينوب عليّ ربّي بخديمة، ونبني مستقبلي وندير التاويل مثل قاع الناس. حاب نتزوج ولكن ماعندي والو، ماعندي خدمة كي الناس، ماعندي لوطو، ماعندي avenir. أوقات نقول ربي يعاقب فيّ لأني كنت في صغري مهبّل والدتي، وكانت دايما تدعي عليّ وتقولّي "الله لا يربّحك".
الله غالب يا خاوتي، على بالي كثّرت عليكم .
رايح بتوقف على الكتابة ونوعدكم نكمللكم حكايتي مع الزمان.
سلام
ملاحظة
كتبت هذا الموضوع بمناسبة مشاركتي المائة في هذا المنتدى

.................................................. ..................................................
السلام عليكم
كنت نقرا مليح وكانوا الأساتذة بزاف يشكروني على الجهد اللي كنت نبذله من أجل تحسين مستواي. صح ما كنتش أحسن تلميذ، ولكن كنت نبذل جهد كبير في البيت وفي الثانوية باش نبقى دايما à jour. رغم الظروف اللي جوّزتها مع المرض تاع يمّا بقيت مليح في الدراسة وبقات نتائجي مليحة. ولكن الله غالب ... دوام الحال من المحال
بدات مشاكلي وهمومي تزيد منذ مرضت يمّا وما لقيتلهاش من يخدم عليّ بالمناسبة أنا وحيد يمّا وبابا متوفي منذ زمن طويل وما عندناش على من نسندوا لأن خوالي بعاد علينا وقليل وين نتشاوفو..
المهم
فقدت تركيزي بالشوية وعدت مانهتمش بالقراية كيف زمان و les notes تاعي طاحو في كل المواد وخاصة المواد الأساسية كالرياضيات والفيزياء، وين صرت ندّي في الامتحان فقط01 من 20. حاولو الأساتذة معي باش يعرفو وين المشكلوهكذا يقدرو يساعدوني، وكانت أستاذة ما زلت نعقل عليها، كانت تهتم بيّ وتحاول تقرّبني منها باش نتجاوز مشاكلي. كنت دايما يبقى في آخر الدرس عندها ونحكيلها على ظروفي ونبكيلها لأني ما لقيتش لمّن نحكي ونبكي.. كانت دايما تقولّي : علاش تفكر وتخمّم بزاف وربي كاين. والله يا خاوتي كانت دايما تواسيني وتعطيني نصائح قيّمة وكنت نحاول نعمل بيها، ولكن ماقدرتش. وبدا مستواي في انخفاض وتدهور وبديت نكره القراية، لأنّي ماقدرتش نوفّق بينها وبين خدمة يمّا. يمّا كانت محتاجتني بزاف، كانت عاجزة كليا، ماتقدرش تنوض من بلاصتها تشرب مثلا، أنا اللي كنت نجيبلها تشرب والله لا يكثّرلي خير، بلا مزية منّي، هذي يمّا اللي ولدتني وما نقدرش نفرّط فيها. كان وقتي كامل معاها، ماكنتش نقدر نروح نراجع دروسي ونخلّيها. كانت تأمرني باش نروح نراجع دروسي وتنصحني ديما باش مانفرّطش في قرايتين ولكن الظروف قهرتني وغلبتني وماعطاتنيش فرصة باش نستدرك ما فاتني...
خايف نكون طوّلت عليكم خاوتي.
رايح نحبّس هنا ونعاود نكتبلكم ما تبقى من قصتي وحكايتي مع الزمان
نتمنى فقط أنكم تقراو قصتي وتحسو بيّ فقط
إلى الملتقى
سلام

مساء الخير اخي
كي قريت حكايتك تفكرت وحدة قرات معايا ماستر فالجامعة معلاباليش وش هي الاسباب اللي خلاتها تحبس قرايتها فالتارمينال
المهم فاتت اكتر من 15 سنة ظهرلها تعاود الباك عاودت عقبت
دات الباك قرات ليسانس ومباعد ماستر ودرك راهي سنة اولى دوكتوراه
شوف ناس كانو فالمستويات تاع الابتدائي المتوسط التانوي احسن منها فالدراسة درك مكملوش الدوكتوراه كما هي
يعني بالارادة اللي عندها تحدات سنها وتحدات كل الظروف المحيطة بها وهاي الدنيا ابتسمتلها
نشالله متياسش برك وخود قصتها عبرة ليك بش تبدا من جديد








رد مع اقتباس