[مداح محمد]

الثمانين (1980)
الصابة و الزرع فوق الركبة و كي يجي الليل الشراب و السكرة فالغابة.
التسعين (1990)
ما بقات صابة ما بقات جليبة بقاو غير الارهاب الضرابة.
الفين (2000)
بدات وئام و كثر الزحام، ولات المرأة بلا لجام، و كملت بالصدام.
الفين و عشرة (2010)
بدات في الصحرا في غرداية الصفرا بالنار و الحجرة.
من بعد صبح الرايس حجرة و خوه مرقها بالحقرة و دار نائب بقرة.
كملت بناس يحوسوا على دولة حرة، يطالبوا بتغيير الحقرة و الحجرة و البقرة.
الفين و عشرين (2020)
بانو و حداخرين، مراناش عارفين كي دايرين، يقولو حنا زينين مراناش سراقين.
بعدها بشهرين (2020)
تخلطت الموازبن و بقات الدبزة على الطحين ، هاذو داخلين و هاذو خارجين.
قالولي يا محمد واش راه صاري في بلادنا، قلتلهم كانت بالعشر سنين ولات بالشهرين.
الله يحفظ المساكين، من هاذ الناس الجيعانين عديمي الضمير و الدين.
كنا نشوفو النسا بالعجار و قليل مين يخرجو من الدار حتى صار اللي صار.
و بقاو الرجال كي النسا قاع لابسين العجار و قاعدين فالدار و يتصنتوا الاخبار .
قالو كورونا تتنقل فالهوى، لا فالحمان و بزاف اللي قالوا فالصمار.
قالو 9 لا 90 لا 900 و بداو يزيدوا الاصفار نهار مور نهار.
بلعوا الجوامع و بقى غير الاذان للسامع، ماعرفناه لا ضار ولا نافع.
هاذ العالم واسع فيه الراس النافع و الصدر المانع و العرب هما التابع.