السلام عليكم رني جبتلكم اليوم وصفة المقيرط او مقروط تلمسان كما يسميه البعض الوصفة عطاتهالي زوجة عمي التلمسانية وهي ناجحة مئة بمئة وجربتها شحال من مرة وجات تهبل وعملتها في عدة مناسبات وكانت تعجب الكل ويطالبوني بالوصفة وهدي المرة درتها الاخي داها معاه لليخدموا معاه ورجال بدورهم طلبوا الوصفة لزوجاتهم فقلت لازم نشارك بها الناس لعمرهم مبخلوا علينا بافكارهم ووصفاتهم نبدوا بسم الله هدي مقادير تع كيلو سميد 1كغ سميد لازم يكون غليض بزاف نقلوه في الكوشة او في مقلات كما نعملوا تع طمينة 250غ سكر عادي 250غ كوكاو يكون مقلي ومرحي ربع لتر زيت انا في الصورة مصورتش الزيت 8 بيض 2خمارة تع قاطو لفاني وقشور اي زازت تع 1كغ ليمون لهذا كين ليسميه مقروط الليم خلطي كل النواشف ثم زيدي مبشور الليمون والزيت ثم في الاخير ضيفي البيض 7 حبات على مرة وشوفي الخليط اذا كان جاري بزاف مضفيش 8 واذا كان ناشف زديها يعني على حساب كبر الحبة هدي المرحلة مصورتهاش نتحصلوا على هدا الخليط خليه يرتاح شوية حتى يقبض روحه ثم عملي حربوش وقطعي مقروطات كما في الصورة قليهم في زيت على نار متوسطة راهم يحماروبلخف لازم متغفليش عليهم وهما سخونين عسليهم وخليهم في العسل يتشربوا مليح ويجو طريين وههي الوصفة جاهزة وزدت حضرتله بنيون بنيون هدي المقادير 1كغ كوكاو يكون مقلي ومحمر مليح ومرحي 2علب قاطو بيمو مرحي نعمل كمية مليحة تع حلوة الترك هنا انت دوقك انا ندوق ونشوف اذا خاص نزيد كمية من مشماش المجفف مقطع قطع صغيرة خلطي كلشي ولمي بالمعجون حتي تقدري تعملي كويرات لا تجري بزاف ومتعمليهش ناشف تم غطسي في الشكولاطة وزيني بخطوط او كما تحبي بصحة وراحة نتمنى يكون نال اعجابكم وتجربوه