الله يبارك على اعمالكم يا البنات. أنا كيفكم علمتني أمي الله يحفظها بصح كنت نتقلق بزاف و حبست. سنين من بعد درت القلب و خدمت واحد الناب بصح من بعد صبت باللي زيرتها بزاف جاتني كي غطاء نتاع الطابونة عاودت في فصل الشتاء مع البرد سخفت على واحد التقاشير في واحد الفيديو جبدت الخيط و الكروشي نتاع النابرون و بديت نتبع بالشوية حتان كملت فردة و فرحت بيها و ما لبستهاش لانوا هاديك التقشيرة تدخل فيها رجل قطة ماشي رجل عبد تماك بديت نتبع في الفيديوات و نصقصي يما على انواع الكروشي (لانو الشاطرة اختكم راحت تخدم التقشير بالكروشي نتاع النابرون هداك الصغير كامل و الكوتون بيرلي) حتان طحت في خدمات ال amigurumi تماك وين حسيت باللي راني نتعلم و خدمت كتكوت اصفر لبنت خالي أظن اني فرحت بيه كثر منها هي هو كرة صفراء مع جنحتين صغار برك بصح كان اول انجاز ناجح. سمحولي الا طولت عليكم الكلام و صراحة ما صورتهمش (هادوك التبهدايل) و الملاح مديتهم بصح بقاولي بعض الانجازات كي كنت نتعلم (و ما زلت نتعلم). هذا المسكين من الانجازات الاوائل طارلوا رجلو و الشال نتاعو و تنقبولو وذنيه بصح ما زالني مخبياتو هدا تسلل من البداية (الوسط)