[نينا الجزائرية]

السلام عليكم ورحمة الله


بعد ما فوتنا الأسبوع اللول و القرايا نص نص مزال مابديناش مليح les prof راهم غير يترينيو وانا عجبتني هكة الحالة نروح نجمع ونقرعج ونرجع خاصة بعد ما زدت تعرفت على زوج بنات لطيفة وفاطيمة كنت نعرفهم من يامات الليسي بصح ماكناش مداسرين بعضانا مليح حتى للجامعة لطيفة تظل تضحك وحاجة ماتسكتها وفاطيمة قافزة بزاااااف وفتيحة كيما قلتلكم تلعبها تعرف كلش غير باش يقولو عليها فاهمة بصح كامل بنات ملاح ويدخلو في القلب.



جاء الأسبوع الثاني والقرايا بدات تتزير الشيوخا مدولنا le programme وبزاف لي بداو يقرونا بصح انا مازلت ضايعة مع الفرنسي نقعد coure كامل وانا نهز في راسي تقول عليا فاهمة كلش وانا لوكان يقلي برك عاوديلي شاقلت يحبس قلبي.





اليوم خرجنا على 12 وحكمنا الجوع وقالك ياسيدي راكم مسجلين في المطعم الجامعي الريسطو تقدرو تاكلوا باااااطل عجبتني العفسة هذي تع باطل قلت للبنات ايا نروحو نشوفو كيفاش الحالة وكي لحقنا لتم قالك لازم تشرو تيكي بسعر رمزي باش تقدرو تفطرو اشرينا التيكيات مدام السعر رمزي ماخسرنا والو وفي الدخلة تع risto لقينا لاشان طويييييييلة قعدنا ساعتين واقفين ومن بعد لي كنت جيعانة شبعت وفي الأخير كي وصلنا لقيناهم دايرين حاجة تشبه للوبيا وشوية ورق تع سلاطة بلا la sos ولي سوفاتني وماخلاتنيش نبكي هي التمر لي حطولنا منو وقواولنا انا رفدت التمر وخرجت خاطر كانت الواحدة والكوغ يبدا على الواحدة رحنا نجرو ولقيناهم دخلو والشيخة هذيك حنونة بزاااااف طلينا عليها غير من الباب ضحكت وهزت راسها كلي قالتلنا ادخلو احنا فرحنا ودخلنا نجرو بصح غير دخلنا وشافونا كامل les étudiants قالتلنا برا شكون قالكم ادخلو جيتو روطار وانا غير ندخل مانقبل حتى واحد يدخل مورايا.




خرجنا وقعدنا في بلاصة شابة فيها الحشيش والظل وحطينا التمر لي جبناه معانا وكلينا كلي ماصرا والوووو.




خلاص هذا اليوم بصح حكايتي مع الريسطو ماخلاصتش رحنا في اليوم الثاني على 11 وكنا شاريين التيكيات وسمعنا بلي راهم دايرين الجاج محمر يسمى حاكمة قلنا رحمة ربي احنا البارح ماكلينا والو اليوم نخلفوها كي وصلنا لقينا جماهير عريضة تقولي حفلة رح يحييها تامر حسني تسللت شوية للوسط قلت هكة باش مانكونش الأخيرة بصح اكتشفت بلي لصقت وسط زوج بنات من نيجيريا وحدة قدامي والثانية مورايا وكل وحدة دايرة كي الحيط انقطع فيا التنفس بغيت نرجع ونخرج مالقيتش كيفاش واخواتنا ناس نيجيريا مزال ماتعلموش هدرتنا قلتلهم مانيش قادرة نتنفس مافهمونيش قلت احسن حل نطلع راسي باش نتنفس مليح بديت نحوس على فاطيمة لقيتها رايحة من جيهة المعوقين وداية plat تع الجاج قلتلكم ساجية اما لطيفة كي لقاتها حامضة عليها سلت روحها وراحت مادارتش اصلا لاشان وفتيحة برك لي بقات معايا مسكينة تبغيني.



بعد ما ازرقت واخضرت واحمرت وصلت اخيرا للتاقة لي يمدولنا منها الأكسجين اه قصدي الماكلة بصح اختكم كانت خالصة ومخلصة قلت الهربة تسلك حطيت plat وخرجت بين الموت والحياة لحقتني فتيحة على شعرة كنت رح نطيح ورجعتني للدار وانا طريق كاملة وانا نحلف بلي هذا آخر يوم نروح لحاجة اسمها الريسطو.



اللهم صلي وسلم على سيدنا محمد