[مشكلتي]

السلام عليكم و رحمة الله و بركاته

انا اعاني في صمت و لا احد يحس بي و كل يوم ياتي يكون أسوا من الذي مضى
انا متزوجة من رجل مطلق مرتين و يكبرني في السن بعشر سنوات قبلت الخطبة لظروف خاصة في ذلك الوقت حيث كنت يائسة من الحياة و اعيش بلا هدف و كانت لي خلافات مع زوجة ابي فتزوجنا هو انسان متخلق لكن اكتشفت فيما بعد انه بخيل و الدورو عزيز عليه و بعد اشهر من زواجنا صار يقولي الدار داري و مايخلينيش نغير حتى في الديكور و كي نقولو بيضا يقولي كحلا حتى كرهت روحي و كرهت الدار و اصبحت مانهتمش بنفسي و مانهتمش بالدار كنت نحس روحي صفر و مع الوقت عرفت بلي راه يخرّج فيا العقد تاعو تاع طليقتيه كانو واعرين و قادرين على روحهم و هوما لي طلبو الطلاق منه وانا لقاني ذليلة و فوق هذا ما يقدرش يتحرك بلا ما يشاور امه و اخوته هوما ليتحكمو فيه انا ما نيش نقولو يكره عائلته و لكن تكون عندو شوية خصوصية تخيلو انه كل شيء يحكيهولهم كل صغيرة و كبيرة
انا الآن نادمة على الزواج به خاصة و اني ارى كل من هم في سني تزوجن من رجال في مثل سنهن و جمعتهم علاقة حب و كرهت نفسي و كرهت كل شيء واصبحت احس باني لا قيمة لي في هذه الحياة و في نفس الوقت يغيضوني ولادي مازالو صغار
راني بن نارين كرهت زوجي و اهله و داري و في نفس الوقت ما نقدرش نطلق من اجل اولادي و ماعندي وين نروح راني في صراع نفسي و زوجي مش حاسس بيا خلاص قتلو شحال من مرة جيبلي راقي بلاك تتحسن حالتي لكنه رفض تماما و في نفس الوقت اخته صرالها مشكل صغير جدا راح فورا قالها أرقي بلاك عين و الله غاضتني روحي حسيت روحي مانسواش لاه انا مانيش عبد اخواته يغيضوه و انا مانغيضوش

وشكرا لكم