ممكن هنا بالنسبة للشوربة قد تكون بقات شوية من البارح و الي قبلو
و للتغيير نقلبها حريرة بإضافة ما ينقص من المكونات و نزيد نتبلها و نرحيها بالبراميكسور
و نقطعلها حشيشة جديدة و شوي نعناع و نكون اقتصدنا و نوعنا
الخبز اذا بقا من قبل اللهم بارك نزيدولوا خبزة فطير للي يحب وهنا التدبيرة اختيارية
و الي حبت تريح تشري خبز فرنسي و الي تزيد تعجن ربي يعينها
الطبق الرئيسي رسميا في بيتنا هو طاجين الزيتون
للملاحظة اغلب الجزائريون يشتركون في اطباق الاسبوع الاول
طاجين الزيتو ن بالدجاج الي يكون بقى من دجاجة الكباب
و يجي بنين بالظهر و الجناحتين و الرقبة و كي يطيبو فتيهم و خلطيهم للزيتون
لان الزيتون يحب الدسم و الجنحين و الظهر مدسمين
أو ممكن باللحم على حساب المقدرة لكن هنا يقطع اللحم صغير شوية باش يشرب بنة الزيتون
أو باللحم المفروم لانقاص التكلفة و اديري داخل كريات اللحم قطعة فرماج
يطلق البنة و يجي بزاف بنين بصح متنسايش الكريات اقليهم قبل ما تحطيهم في المرقة
مع الزيتون انا نحب ندير في بلاصة البوراك بيتزا صغيرة خاصة اذا ما عجنتش المطلوع
و تكوني استفدتي من وجود الزيتون الاخضر و شوي دجاج للانقاص أو علبة طونا
و السلطة من الجميل يكون فيها بيض مغلي و الماييز و المايونيز اجي بنينة مع طاجين الزيتون
أما التحلية أقترح فلان شوكولا أو فراز حسب الذوق
و للحديث بقية حتى تأتي الفراشات الذكية
و تثري الموضوع باقتراحات شهية