اقتباس:
المشاركة الأصلية كتبت بواسطة boukadoumzinou
سلام عليكم خويا
حبيت نوضحلك بعض النقاط برك قبل ما يفوت الوقت
انا عندي خبرة فتربية الدجاج و كل عام ندير 4 كوطات تاع دجاج يعني 4 دفعات كل دفعة فيها 3000 فلوس و راني من سنة 2013 و حنا نخدموه و مدايرين 2 بولايات ( 2 بيوت بلاستيكية )
ننصحك اخطيك من هاذ البروجي لانو هاذ المشروع ماشي تاع شباب و يحتاج خبرة 5_ 8 سنين على الاقل و الخسارة فيه كتر من الفايدة و الربح هو انك كي متخسرش دراهم و ترجع دراهمك و زيدلها خدمة خامجة حاشاك بالريحة تاع النشادر و الفيميا ...
و اذا انت مصر على انك تخدم فهاد المجال دبر راسك و انا راح نعطيك المعلومات لي تحتاجها فالاسفل
المعلومات /
اولا وجد 20 مليون تشري بيها الفلوس و السعر يختلف كل مرة حسب سعر الفلوس و العدد يعني شحال تحتاج و انا فالعادة نشري 2800
2 : قبل ماتشري الفلوس اختر النوعية تاعو بدقة لانو كاين فلوس يحمل الصيف كيما لالبوراك و كاين لي يحمل البرد ميحملش السخانة
3: راح تكري بيت بلاستيكي اذا معندكش و من الافضل يكون مخدوم بالقصب و الديس و يكون في منطقة مليحة حسب الجو يعني اذا كان فصل الصيف فمن الافضل انك تكري البولاي في منطقة فيها الريح و التهوية و مغطية من الشمس
4 : متستعملش البيوت البلاستيكية لي مخدومة من البوليسثار
5 : اغسل الماجوارات تاع الاكل بالماء و الجافيل و تاكد من انو البولاي مغسول بالمبيد مداوي مليح
6 : جهز الكهرباء و 6 قارورات غاز للتدفئة
7 : اتفق مع خدام يحكملك الكوطة تاع الجاج لمدة 60 يوم ليل نهار السعر تاع الخدام هو 10 ملايين
8 : اختر طبيب البيطري لي راح تتعامل معاه لانك راح تبقى تتعامل معاه من البداية حتى النهاية
الطبيب البيطري او الفيثيرينار ه لي راح تعطيه دراهم و هو يشريلك الفلوس و يبعتهولك عند باب البولاي
بالنسبة للطعام عندو 3 أنواع كاين الديمارج و الكراسونس و الفينيسيو و كل ماكلة تمدها في مرحلة معين و بكمية معينة و الطبيب هو لي يقولك
الماكلة و الدواء و الفحص الطبي راح يكونو كريدي من عند الطبيب
بصح كاين بعض الاطبة ميوفروش الماكلة يعني راح تشريها من المصنع كريدي و التوصيل تعها كريدي تاني
و بالنسبة للماء راح تتفق مع شخص يجيبلك الماء لمدة شهرين و ديما تقريب يكون سعر الماء لي يستهلكو الفلوس هو زوج ملايين
نضن وضحتلك كلش درك نمدلك شوية ملاحظات
الوزن تاع الدجاج فالصيف يكون خفيف زوج كيلو و نص و فالشتاء يكون من 3 حتى تقريبا 4 كيل لانو الجاج كي يبرد ياكل
متبقاش داخل خارج في نص الجاج لانك راح تنقل الميكروب من الخارج للنص تاع الجاج
اخطر ميكروب هو الغومبور الفيروس هاذا ديما يقتل 60 بالمئة من الدجاج و تقريبا قاسني هذا الفيروس 20 خطرة ولا كتر
الادوية قادر توصل حتى 20 مليون كن متعرفش تصرف و تحط خدام جديد
حداري من قارورات الغاز قادر تحرق البيت و تحرق الفلوس و تحرق الخدام
حداري من تسربات الغاز
حداري من الكهرباء فاي شرارة تؤدي الى حرق البيت البلاستيكيذ
حداري من اذخال الغرباء
اغلق خزان الماء بقفل لانو اي شخص قادر يحطلك سم فيه لانو شعب حساد
6 ملايين سعر كراء البيت البلاستيكي الممتاز
1 مليون لتنضيف البيت البلاستيكي
الطبيب البيطري ه من يقوم بجلب المشترين اليك ان اردت ذالك
انخفاض سعر الفلوس لايحدد ان كنت ستربح ام تخسر
خطرة شريتو باطل و خسرت 36 مليون ههههه لانو مرض و مات
كي تشري اشري في وقت يكون في الجاج كاين بزاف فالبولايات و السعر تاع طايح
اشري الفلوس في وقت لازم كي تبيعو فيه يكون عدا على مناسبة دينية اسبوع على الاقل مثلا دير حسابك كي تشريه متبيعوش في عاشوراء و لا فالمولد النبوي الشريف لازم يكون عدا عليهم اسبع على الاقل لانو بعد اسبوع راح تلقى كمية الدجاج فالاسواق نقصت و بالتالي يرتفع السعر
لكان حاب تخدم متبداش وحدك باه تقسط الخسارة ان قدرها الله عزوجل
اي استفسار او سؤال انا هنا موجود
بالتوفيق
|
نعم اخي كل هدا موضوع في عين الاعتبار
فقط نقة سعر الفلوس انت مخطا حاليا السعر 20 دج جزائري فصيلة لاربوراك طبعا الجيد لفصل الشتاء
قضية المرض البيطري يتكفل بالمهمة يعني ان لم تضع بيطري اكيد انت تغامر
نتمنى التوفيق