صباح الخير على الجميع ارتأيت ان أضع صور حلوياتي لعيد الفطر ،، هي حلويات بسيطة أتمنى ان تنال إعجابكم تشاراك بالعجينة السحرية قاتو بالكاوكاو و النواة كوكو صابلي بالزيت نفس القاتو بالكاوكاو و النواة كوكو فقط غيرت الشكل و التزيين مقروظ المقلة محشي باللوز نظرا لطلب من الأخوات عملت تعديل و حطيت الوصفات هنا باش نسهل عليهم البحث القلاساج درت بياض بيضة و فنجان مخلط بين مارغرين ذايبة و زيت ،، فنجان حليب ساءل طبعا ،، فنجان مازهر ملون ابيض و كمية من نيسكافي محلولة في شوييييية ماء لازم يكون مركز و نبدأ نضيف السكر لرطب حتى نتحصل على القوام المطلوب للأمانة هذ القلاساج راه لحبيبتي ام محمد تاج و انا درته بذوق النيسكافي و راني اعتمدته خلاص رووووعة ربي يخليها و يرجعهالنا بخير وصفة التشاراك درته بالعجينة السحرية لي هي عبر مارغرين ذائبة و باردة عبر زيت عبر حليب م ص فاني بودرة و لميت بالفرينة حتى تحصلت على عجينة ماهي طرية ماهي يابسة ،، نخليها ترتاح شوية فالثلاجة و نبدأ نخدم بيها الحشو درت 3 عبار كاوكاو محمص و مرحي و كمية من حلوة الترك رحيتها مع الكاكاو و شوية برك سكر و لميت بمعجون المشمش و شكلت حرابيش و حشيت بيهم العجينة التزيين درته بالشوكولا البيضاء و السوداء و خلااااص صابلي الزيت درت الوصفة تاع حبيبتي ريهام ربي يرجعهالنا بخير انا درت نصف الكمية 3 حبات بيض كاس سكر عادي كاس و نصف زيت فاني بودرة كاس مايزينة كيس خميرة الحلويات فرينة حسب الحاجة خلطت البيض و السكر بيدي مليييييح و من بعد بديت نضيف بقية المكونات حتى تحصلت على عجينة طرية و شكلت دوائر و طيبتهم و لصقت هم بالمعجون كما هو معروف و زينت الحواف بالكاكاو محمص و مرحي قاتو الكاوكاو و النواة كوكو وصفتي https://www.djelfa.info/vb/showthread...362108&page=77 رقم المشاركة 1145 و 1148 المقروظ تاني وصفتي https://www.djelfa.info/vb/showthread...362108&page=77 رقم المشاركة 1149 و في الأخير أقول لكم كل عام و أنتم بألف خير ،، أعاده الله علينا و على المسلمين بالخير و اليمن و البركات و السلام خير ختام و صل اللهم على سيدنا محمد ،، و الحمد لله رب العالمين