ام محمد تاج
طمينة اللوز
شوفي أربع كيلات لوز بكيلة سكر عادي فاني وكيلة ماء وردوزاست القارص والزبدة حسب كمية اللوز لي عندك قادرة تجيك مغرف كبيرة ولا زوج إذا عاملة كمية كبيرة حطيهم في الكوكوط وابقاي حركي مليح حتان تتلم وتولي عجينة ضيفيلها ملون مثلا وردي ولا أخضر ثم فرشي البلاطو تاعك بالسكر قلاصي وابسطيها لازم تجي خشينة الرقيقة ماعندها حتى معنى وخليها تبرد مليح وزيدي رشي عليها السكر قلاصي بالصفاية كوشة مليحة وخليها تبات على الأقل يومين باه تشرب مليح وتتماسك ومبعد قصيها مربعات وحطيها في لي كيسات
ملاحظة: ماء الورد ضيفي بالشوي أنت وكمية اللوز لي عندك كي تتلم ودير عجينة حبسي ماء الورد
ام محمد تاج
انواع الغريبية
غريبية عادي لي دايما نعتمدها: كيلة سمن قوراية ذايبة وباردة على الأقل أربع ساعات في الثلاجة + كيلة غير زوج صباع سكر قلاصي المرجان أو مولان غوج خبطيهم مليح وضيفي الفرينة حتان تتلم وأطبعي وطيبي وباه تعرفيها خلاص الفرينة جربي وحدة إذا ماتفشتش وساحت يعني خلاص الفرينة
* غريبية روايال هاذي لغريبية لعزيزة:
كيلة زبدة ستار ذايبة وباردة ومصفية من الحليب لي يبقى تحت+كيلة سكر قلاصي غير صبع+ ونص كيلة سكر عادي +كيلة جوز مرحي رقيق ثم شيحيها بالفرينة وأطبعيها ولا شكليها باه تحبي وطيبيها
* غريبية بالبيض روعة وصفة أمي ربي يرحمها:
رطل زبدة+ كأس سكر قلاصي+ كاس كاوكاو مرحي رقيق+ كاس ماء الزهر+ زوج بيضات والفرينة لمي بيها شكليها وطيبيها كي طيب ذرذري عليها السكر قلاصي
* غريبة الخايبات: كيلو سمن المدينة طري وبارد+ 900 غ سكر قلاصي+ كيلو كاوكاو مرحي رقيق وكيلو ونص فرينة تلمي بيها أطبعيها ولا شكليها واش تحبي وطيبيها هاذي تقطع بزاف واقتصادية وبنينة تهبل تهبل
ونديرو غريبية اللبلابي راهي غريبية عادي ضيفيلها زوج كيسان لبلابي مرحي ومغربل وكملي شيحيها بالفرينة تجي تهبل ثاني
وإذا حابة ديريها بالجلجلاني الحق ماتعجبنيش بزاف تجي مرة من الجلجلانية
للغالية ام محمد تاج
لي روس على طريقة أم محمد تاج لعيووون نهال الحبوبة
العجينة: 100 غ زبدة وثلاث ملاعق أكل عسل وبيضة وكاس سكر ناعم و زوج مغارف صغار بيكاربونات وأربيع مغارف كبار معجون مشماش ومغرف صغيرة فاني
الكريمة: كأس ماء وكاس سكر قلاصي و12 مغرف حليب غبرة و 100 غ زبدة طرية
تحضير العجينة: ذوبي الزبدة والعسل والمعجون على نار هادئة وغليها ثم خليها تبرد كي تبرد ضيفيلها البيضة والسكر والبيكاربونات والفاني والفرينة بالتدريج حتى تتحصلي على عجينة طرية وخفيفة
أقسميها ال أربع أقسام وأبداي حلي كل قسم وأثقبيه بالفرشيطة وطيبيه كي يحمار نحيه وأطلي كل طبقة بالكريمة التالية: خلطي الماء والحليب الغبرة والسكر والفاني وحطيهم على النار حتى يخثار الخليط ويثقال مليح خليها تبرد تماما وحطيها في الثلاجة تكمل تبرد مليح
ومن جهة أخرى خبطي ال100 غ زبدة مع مغرف سكر قلاصي حتان يبياض الخليط نحي الخليط من الثلاجة وبواسطة الباتور خلطي معاه الزبدة وضرك تتحصلي على كريمة ناعمة وتهبل أدهني بين الطبقات وزينيه من الفوق بالشيكولا وفتات الحواشي مرحي وفي الأخير رشة سكر قلاصي بالصفاية