[natacabell]

المشاركة الأصلية كتبت بواسطة إلهام07

اللي ضحكو عليا كامل مازعفتش منهم بصح درت القلب وقلت لازم نخليهم يضحكو أيامات ونفاجأهم بتطبيقات هكذا باش يعرفو واش يكونو العمريات رحت نهار الخميس لعشية قضيت وطبقت 4 وصفات في الويكاند وهكذا كملت 10 تطبيقات مع 6 اللي كانو عندي وقلت نفاجأهم برقم قياسي :

نبداو بسم الله :

* التطبيق الأول : ديول أم كوثر اللي ضحكتو عليا فيهم
كنت كل يوم في الليل نجرب في الصينيات كامل اللي عندي ،في البلاطو نتاع الفرن بكل الطرق والو يلصقو ،آخر مرة بالسيف لا صلحو في الطاجين كانت العجين مابقاتش بزاف بصح المهم نجحو ومانيش حابسة حتى وين نولي محترفة ديول . نحب نوضح حاجة باللي راني خدمت في الطاجين يعني ماشي كيما المقلاة عندها اليد منين تحكمي ودور باش تخدمي والمقلاة مدورة يعني تبعيها برك يخرج الشكل مدور ، أنا دورتهم وحدي يعني فور عليكم .
ورايحة بإذن الله نبقى نعاود كل أسبوع حتى وين يوليو 10/10

وهاذي المرة مارميت والو كي بقات شوية عجين درتها قرصة صغيرة ، سلاحف النينجا راهم كرهو من العجين اللي نرميه عليهم في المجاري.
وسمعت باللي بروقة قالت باللي كي يجيني خطاب تحضر في الجماعة وتقول:" عليها وحد الديول ماشاء الله "
هاهم طايبين ومقرمشين بشكل غير عادي أكثر من الديول اللي يتباعو :


* التطبيق الثاني : تشيز كيك اقتصادي

جاونا ضياف غفلة (كي العادة ) قطعتها وكنت هاذاك وين حطيت عليها مربي الفراز ماعندوش 20د ماجمدش بصح البنة وحاااامضة مع أنني درت كاس سكر بدلا من 1/2 والمعجون ثاني حامض ونصيحة رشو فقط سكر من فوق بدلا من المعجون راهي :


* التطبيق الثالث : مربى الفراولة لأم راضية اللي استعملتو في التشيز كيك


* التطبيق الرابع : غراتان الكرمب ( الملفوف ) نتاع أم ماجد
تفاجأت باستحسان عائلتي بالاجماع عادة والله مايعجبهم لعجب وحتى ويعجبهم لازم يعطيو ملاحظات أو يعلقو ، هذا قالولي راهو parfait أكدت معاهم قالو بنين ماعندنا حتى ملاحظة ، حتى أختي دات منو للخدمة البنات اللي معاها طلبو الوصفة :



* التطبيق الخامس : تحلية باردة للأخت moslih29
نصيحة استعملو 3/4 ل حليب مع دوز فلان نتاع 1ل باش يجمد مليح وشربو الكيك مليح بالفلان :19 ، أنا زينت فقط بالكاراميل :


* التطبيق السادس : خبز أم أماني
هايل ، يعطيك الصحة أم أماني ، طبقتو عدة مرات :



* التطبيق السابع : الخبز العربي لحبيبتي أنوثة شرقية
رائع وناجح 100/100 أتمنى أن تعود بسرعة راني توحشت هاذاك الطبوز بزاااااااااااااف


هنايا خلاص ديتها في روحي وحطيت روحي بروفيسيونال وليت نطيب بالزوج أحم أحم :


* التطبيق الثامن : عصير التفاح
رائع وليت مدمنة عليه ونطبقو ديما ، ساهل وخفيف ملي حفظتو وليت مانكيل مانوزن ، نصيحة فقط ماتزيدولوش الحليب ، لاخاطر عصير الليمون يروب الحليب بمجرد ما تضيفو الحليب رايح تلاحظو على الفور أن الحليب يولي كتل :


* التطبيق التاسع : العجينة المورقة نتاع أم راضية


* التطبيق العاشر : تيراميسو فلة


لي عودة فيما بعد لوضع الروابط

ضرك شفتو لفحالة ولا مازال عندكم شك ؟

يعطيك الصحة الهام انا مضحكتش عليك انا ديقات لي نديرهم اووووه ميعلم بيهم غير ربي هههه سر المهنة كلشي يشهي يعطيك الصحة ي ل قافزا بارك الله فيك تطبيقات ناجحين مية ب المية و عمري مكان عندي شك في شطارتك ياااا الفحلة