بسم الله الرحمن الرحيم السلام عليكم و رحمة الله واش حوالكم حبيبات قلبي إن شاء الله في أحسن حال اليو جبتلكم طبخة الكل يعرفوها و ماكاش لي ميحبهاش خاصة أولادنا و محبوبة جدا خاصة في فصل الصيف مع قارورة قازوز صنع جزائري ممممممم بحكم حرارة بلادنا ....الحمد لله على كل حال المهم عرفتوها و هي الفريت أوملات بصح كاين مشكل و هو الزيـــــــــــــــــــت غالي بزاف أمالا خممت فيكم و جبتلكم فكرة إختراعي و هي فريت أوملات بلا قليان بطاطا هكذا تمتعوا أولادكم و في نفس الوقت تقتصدوا في الزيت المهم نحتاجو كمية من البطاطا و كنت طيبت شوية لحم مرحي باس نحشيها للأولاد نرابيو البطاطا في الروبو في الديسك الضيق الرقيق هذا هو نجيبو البيض أنا الكمية لي عندي درتلها 3 بيضات +ملعقتين زيت +ملح+فلفل + على رأس ملعقة قهوة خميرة كيهياوية + نضربهمبالباتور حتى يتضاعف حجمه مليح نضيفلو البطاطا المرابية +المعدنوس و نخلط حتى ينسجمو مليح بلا ما تحبطي البيض نجيبو مقلة ما تلصقش نحطو فيها الزيت و هي باردة نفرغوا نصف كمية البطاطا ثم نفرشو اللحم ثم قليل من الجبن أي نوع ثم نغطي بالنصف الباقي من البطاطا نحط فوقها قطع صغيرة من الزبدة و نغطيها أنا غطيتها بصحن كبيرو نضعها فوق النار على أدنى درجة حرارة نتركها تتطهى حتى تتحمر من تحت ممكن 10 دقائق ثم نقلبها و هذه أسهل طريقة نفرغ الخبزة فوق صحن أم مغط كبير ثم نحط فوقها المقلة أي نكبها ثم نقلب الصحن و هكذا تتقلب الخبزة لاحظوا نزيد نغطيها و نخليها تطيب من تحت مليح ثم قدميها و للتزيين رشي جبن مبشور أو أي شئ ثاني و الله غير البطاطا طابت زبدة و البنة كيما المقلية تماما و هكذا توفرو شوية زيت و تمتعو ولادكم ورمضان على الأبواب هذا ماينفع في السخانة زيد إقتصادية و صحية و ماتديش الوقت و تقدري تنوعي في الحشودجاج أو طون و تقدميها على شكل تورت بطاطا محشية إن شاءالله تجربوها و تعجبكم كيما عجبت عائلتي و دعوة خير لعائلتي الكبيرة و الصغيرة و لوالدايا بالشفاء تكفيني و لكم بالمثل إن شاء الله إنتظروني بحولالله في وصفات أخرى طبعا الإقتصادية