[لؤلؤة تلمسان]

المشاركة الأصلية كتبت بواسطة crono

عجبتني قلت نفيدكم بيها 😁😁😍😍
1/ قبل مايبداو يذبحو نوضي بكري طيبي كسرة ولا خبز الدار اتهناي من وجدي البطاطا لي رح تقليها و حطيها بجيه زيدي دوزني السلاطة و قطعيها حطيها بجيهة اغلقي البيبان تع البيوت باش ما توصلهمش ريحة التشواط و الشواء و يبقاو مفحفحين بعد ما تكملي افتحيهم 👍
2/ الدوارة كيما يخرجوها بعد ابداي فيها هي اللولا اقسميها على 3 الكرش لكبيرة و المتوسطة و هاديك طلاقة النساء احكمي التويو حطيهه في فمها و بلعيه و خضيها مليح باش يتحلل العشب الى فيها و يخرج فاسيلمو دريلها فتحة من تحت و هكذا 👍
3/ احكمي لمصارن كيف كيف نقيهم مليح بالتويو و قلبيهم لاااااازم و نحيلهم هاديك الشحمة الزايدة في الاخير عقميهم بالخل والملح في الماء👍
4/ اذا توكلو البوزلوف شوطيه مليح ع الطابونة و كرطيه مليييييح شحال من مرة هو و الكرعين و مبعد اغسليهم مليح بجاكش حديد يكون خشين و جديد في شوية ماء و ازيس باش ينحيلك هادي لكحولية و اذا ما تاكلوهش صدقيه كيما يتذبح بعد 👍
5/ الجلد اذا ماتسحقيهوش صدقيه كيما يذبحلك الموسيو و اذا تحتاجيه كيما يتسلخ بعد لميه الجهة تع الشحمة برا و جهة الصوف لداخل و حطيه ف ساشي نوار (sac poubelle) و اغلقي ملييييح بعد يومين افتيحا و ابداي انزعي الصوف رح يتنحالك بكل سهولة و اغسليه ملييييح شحال من مرة 👍
6/هنا راكي كملتي الشي لكبير ابداي درك يا لفحلة في تحضير لغداء كل واحد كيفاه حنا نديرو بولفاف تع لكبدة و نقلو شوية م الريا و القلب و الطحال و فريت و سلاطة ڨازوز و ديسار و الله يديمها نعمة .
7/ الوقت الي الي راكي اطيبي فيه اضربي تسييقة للمكان لي خدمتي فيه و فحفحي الدار بروايح الله الله اتغذاو و روحي ديري دوش ينحي عليك الغمة و كل عام و الأمة الاسلامية بخير يا رب
لي تفوت منا تدعيلي من قلبها تعبت و انا نكتب😘😍😘😍😘😍😘

جزاك الله خيرا... بارك الله فيك على النصائح... نفس الخطوات اتبعها أنا تعلمتها من ماما ربي يحفظها