الدولمة انواع هذه وصفة دولمة نتاع البطاطا والكورجات والفلفل الحلو
أولا قومي بغسل كمية اللحم اللي حابة ديريها ..
كالعادةهرسي 5أو6 سنون ثوم ثم ترابي حبة بصل وحبة طماطم وأضيفي ملعقتين كبيرتين من معجون الطماطم ( اذا كنتي حابة المرقة تجي حمرة واذا كنتي حاباتيها مرقة بيضة استبدليها بملعقة عرق اصفر) ثم ملعقة فلفل اسود وعودين من قرفة ( نصيحة لاتضعي القرفة المرحية في اي مرق لأنها تسودها بدل اللون الأصفر الذهبي ) ولا تنسي ملعقة ملح ( عينك ميزانك) ثم ملعقة زيت( كما قلت لك هذه الكمية تضيفيها بيكي درت اللحم اما اذا لم تضعي اللحم فضعي أربع ملاعق زيت ) وورقتين رند ثم ضعي اللحم مع الخليط على النار يتكتك(خطوة في كل أنواع اللحوم للبنة) لمدة 3د مثلا .. ثم اضيفي كمشة من الحمص حسب الرغبة وفي الأخير تكوني طبختي كمية من الماء ضفيها وسكري الكوكوت إلى ان ينضج اللحم..
من جهة ثانية تكوني حفرتي البطاطا والكورجات والفلفل الحلو) طبعا تكوني نحيتيلو الزريعة نتاعو).. باه تحشيهم باللحم المرحي..
كيفية تتبيل اللحم المرحي
هرسي 4سنات ثوم ونصف حبة بصل ملعقة فلفل اسود وملح وملعقة صغيرة طماطم مصبرة للبنة وكمية مقطعة من الحشاوش وكمية من روز طايب نص طياب (اضيفي بيضة ليتماسك اللحم هذا اذا مادرتيش الروز ) .. وامزجيهم مع بعض
خطوة مهمة للبنة:قومي بتحمير البطاطا والكورجات والفلفل الحلو تحميرا خفيفا بعد ما حفرتيهم..
ثم احشيهم باللحم المرحي وتكوني قد راقبت نضج اللحم بعد ذلك ضعي البطاطا والكورجات والفلفل
الحلو في المرق وخلهم ينضجو.... وبالهناء والشفاء
كاين ثاني دولمة الكرم ونفس الطريقة استبدليهم بالكرم
الكرم خليه ورقات كبار فوريهم ثم ضعي في داخل الورقة الواحدة كمية من اللحم المرحي ولفيها واربطيها بخيط نتاع خياطة رقيق( لكي لا تفتح طبعا بعد النضج تنزعيه بعد ميكون قد حافظ على شكلو)
...... ...............................
تصبحين على خير وصح سحورك وان شاء نغتنمو كل لحظة من أيام هذا الشهر المعظم