يا امال يا حنونتي اسمحيلي طولت عليك كيما وعدتك حبيت نوريك طريقة طهي بعض الوصفات اللي نطيبهم بنفسي باه تفهميني أكثر ...ونزودك بنصائح في كل مرحلة باه تحافظي وتحصلي على البنة اللي راكي حابتيها..
أولا الشربة (مرمز ولا فريك حسب الذوق) الطبق الرئيسي في شهر رمضان( في بيتنا)
احضري كمية اللحم قطعيها قطع صغيرة ثم اغسليها وخليها تقطر
من جهة ثانية احظري الكوكوت( أو القدرة نطيبو فيها في رمضان فقط) هرسي 5أو6 سنون ثوم( الأفضل انو تهرسيهم في مهراس اذا كان عندك مع القليل من الملح)ثم ترابي حبة بصل وحبة طماطم وأضيفي ملعقتين كبيرتين من معجون الطماطم ثم وملعقة متوسطة من الأفاح (كسبر مرحي تجدينه عند اللي يبيعو التوابل) ولا تنسي ملعقة ملح ( عينك ميزانك) ثم ملعقة زيت( هذه الكمية تضيفيها بيكي درت اللحم اما اذا لم تضعي اللحم فضعي أربع ملاعق زيت ) ثم ضعي اللحم مع الخليط عل النار يتكتك لمدة 3د مثلا (باش يبنن اللحم) وفي الأخير تكوني طبختي كمية من الماء ضفيه على الخليط ومقدار ما ترفدي بلالوش كمية نتاع تشيشة( طبعا تكوني غسلتيها ) وسكري عليها الكوكوت لمدة نصف ساعة تقريبا ..افتحي الكوكوت وشوفي اذا كان طاب اللحم ولا مازال وتشوفي اذا كاشما كان خاصها ملح ولا معجون طماطم ...انت ادرى..
المهم عند التقديم قطعيلها الحشاوش( تقطيع الحشاوش يكون رقيق ) وروشيتات فلفل حار اخضر.... وبالهنا والشفا
ان شاء تكوني فهمتيني وأي سؤال انا جاهزة وفي المساء ان شاء الله نكملك وصفات اخرى ....سلام انتظر الرد....