اقتباس:
المشاركة الأصلية كتبت بواسطة امينة مناد
السلام عليكم
اختي حبيبة هل تستطعين مساعدتي .
حاولت ان اخطط لحياتي ولم استطيع اد اهتممت بحالي وزوجي اهملت ابنتي وادا اهتممت باعمال البيت اهلت نفسي والله لا اعرف مادا افعل المهم انا لديا طفلة واحدة في سن عامين ونصف واسكن مع عائلة زوجي ولكني مثلما نقول في العمية قاسمة اي عازلة عندي غرفة نوم ومطبخ وغرفة جلوس ولكن الحمام والفناء والسلالم اي الدروج مع عائلة زوجي ومنه انا يا اختي لا اعرف كيف انظم وقتي فهل تستطعين المساعدة
|
و عليكم السلام
حبيبتي أمينة
راني في الخدمة حبيبتي
الشي اللي يقدرني ربي عليه
ما نتأخرش عليك بإذن الله
كلشي ساهل حبيبتي
ما تتقلقيش
و ما تتحيريش
بإذن الله رايحة نعطيك برنامج يومي
إذا والمك و امشيتي عليه
رايحة تكوني راضية و مرتاحة
ربي يخليلك البنيتة و يحفظهالك
اللهم آآآمييين
شوفي حبيبتي
رغم راكي قاسمة لكن الحمام و الدروج و الفناء
راكي عندك اشتراك فيهم
يعني لازم تنظفيهم بلاما تستني حتى حد
ما تقوليش ماشي غير أنا اللي راني نستعملهم
هوما تاني لازمهم ينظفوهم
لالا
نظفيهم كي شغل انتاوعك
مهما توسخوا من بعدها
غير شطفة على السريع و راكي رجعتيهم يبرقوا
ثقي بي حبيبتي
هاد التصرف رايح يفتحلك بزاف بيبان في وجهك بإذن الله
نرجع للغرف اللي راكي حاملة مسؤولياتهم
بسم الله نتوكل على الله
الصباح نوضي قبل الفجر بربع ساعة
باش تتوضي و تجهزي نفسك للصلاة
صلي الفجر و الصبح
اقري ورد يومي من القرآن
أنتي حددي الكمية يا لوكان صفحة وحدة و ماعليش
أذكري الله يعني أذكار الصباح
البسي بيجامة ولا لباس البيت يكون شباب
و حطي كريم الترطيب على وجهك
راني حطيت في صفحة الدورة خطوات العناية بالبشرة ممكن تفيدك حبيبتي
شوية كحل أو ماسكارا و مورد الخدود على خفيف يبان طبيعي
و افتحي الشبابيك و اتمتعي بنسيم الصباح
اللي يشرح القلب و اذكري الله سبحان الله
و روحي جهزي الفطور لزوجك
افطري معاه و لما يروح نوضي بنيتك إذا كانت عادا ما ناضتش
اغسليلها و بدليلها و فطريها
و خليها قدامك و توكلي على الله
شغلي القرىن لطرد الشيطان
لمي مواعين الفطور حطيهم فالمجلى ينقعوا فالما دافي
اغسلي الفرن
ابدي بتجهيز الغذاء
لما تكملي التجهيز
اغسلي كامل الماعين
نتاع الفطور و اللي استخدمتيهم لتجهيز الغذاء
و امسحي البوتاجي و لمي الكوزينة على السريع
ارجعي للغرفة نتاعك رتبي السرير
و التسريحة
ممكن ترجعي للدروس الخاصة بدورة الرقي لمدبرة منزل مثالية
فيها طريقة ترتيب كل الغرف في البيت بما فيها غرفة النوم
و كل ما فيها
امسحي الغبرة
اكنسيها
و ارجعي لغرفة الجلوس نفس الشيء
ترتيب سريع و مسح الغبار و كنس
و اهبطي للحمام اغسليه و عطريه
عندي طريقة ممكن تستعمليها لتعطير الحمام
جيبي قرعة نتاع توب معطر الأرضيات
و ديري ثقب في الغطاء
و بعد تنظيف الحمام أعزك الله
قطري بعض القطرات فالأركان نتاع الحمام
رايحة تبقى الريحة الجميلة لمدة لا بأس بها بإذن الله
و اغسلي الدروج
شوفي حبيبتي ما فهمتش موقع الدروج في بيتك
نصيحتي
إذا كانوا نتاع المدخل نتاع البيت
ابدي بيهم قبل ما تدخلي للكوزينة باش توجدي الغذاء
و إذا كانوا لداخل خليهم للاخير
و كملي الميناج بمسح الأرضيات
بماء فيه معطر الارضيات و قطرات من الخل الابيض
و قطرات من جافيل
و بعدما تنشف الارضيات
اغلقي الشبابيك و البيبان
و عطري البيت كلوا حتى الكوزينة
و اغتسلي و غيري قشك
و جهزي روحك و طاولة الغذاء لزوجك
بعد الغذاء لمي المواعين على السريع
تحبي تغسليهم في وقتهم كان بها
وإذا حبيتي ترتاحي شوية
خليهم ينقعوا فالمجلى و لما تحبي تحطي القهوة اغسليهم
عندي تاني نصيحة هنا
انا راني معتامدتها في بيتنا
أنك تجهزي القهوة نتاع العشية فالصباح
في نفس الوقت اللي تكوني ترتبي فيه أواني فطور الصباح بعدما تغسليهم و ينشفوا
و تحطيها فالثلاجة
و توجدي الصينية و تغطيها و تخليها للعشية
بعد القهوة ارتاحي شوية معا عائلتك
و من بعد لمي الماعين على السريع
و إذا شفتي عندك الوقت فارغ
استغليه فيما يرضي الله
و يحسن من نفسك
اقري و اتعلمي كل يوم حاجة جديدة
حاولي كل يوم تكوني أحسن ماليوم اللي فات
اهتمي بنفسك و ببنتك
احسني لأهل زوجك
زوريهم و أكرميهم
و كوني بنتهم
و تفكريهم بالهدية أو باكلة
خصوصا إذا كانت تحبها والدة أو والد زوجك
نوصيك تهادوا تحابوا
ما تنسيش الصلاة في وقتها
بعد المغرب اقري أذكار المساء
و ابدي تجهيز العشاء
بعد العشاء لازم تلمي الكوزينة و تنقيها
هاكذا الصباح لما تدخليها قلبك يكون مشروح
و رتبي بيت الجلوس على السريع
هاكدا يوم الغد مارايحاش اتعبك و تاخذ وقت فالتنظيف
و اغتسلي ولا دوشي و حطي كريم لترطيب بشرة الجسم
أو معطر للجسم ريحته تبقى 24 ساعة
و رطبي يديك و رجليك بفازلين مثلا
و حطي كريم الليل لوجهك
و قبل النوم انوصيك بالتسبيح
33 مرة سبحان الله
33 مرة الحمد لله
34 مرة الله أكبر
اقري المعوذات و آية الكرسي و سورة الفاتحة
و نوم الهنا