بسم الله الرحمن الرحيم
(5)
السلام عليكم ورحمة الله وبركاته
طب بعض الاخوات تقول ادعى لى ان ربنا يهدينى الاول وبعد كده البسه !!
طب انتى وانتى لابسة حجابك(غطاء الرأس) لما كبرتى قعدتى تقولى لما ربنا يهدينى !!
انا بقولك ده على اساس انك لسه مقتنعة ان هو ده الحجاب الشرعى اقصد انى مقلتش هنا النقاب فرض ولا حاجة....
لا مقلتيش كده.... بالرغم من انك في قرارة نفسك لابسة غطاء الرأس على انه فرض
اذن تنفيذك لفروض ربنا ومنها حجابك وتسترك مالوش علاقة بدرجة الالتزام والهداية
يعنى مش طول الحجاب مقياس على درجة الالتزام !!
لكن لا ننكر انه عامل مهم انه بيضعك في صورة محترمة وصورة نساء المؤمنين
(والله يهدى من يشاء)
البسي الاول وهتلاقي النقاب نفسه بيضفي عليكى مشاعر وموجبات الالتزام منها غض البصر ليكى وبتعينى غيرك بيه وخفض الصوت وطبعا مفيش اختلاط مفيش سلام باليد مفيش تبرج في حجابك ولا زينة في نفسه ولا لباس شهرة
طب في اخوات بيقولو اخاف البسه وبعدين اخلعه تانى؟؟؟
يعنى اذكر حاجة غريبة
الشيوخ اللى بيدعوا لسنن اعفاء اللحية بيقولوا ايه في موضوع زى ده
بيقولوا"خلى لحيتك تربيك"
"واللحية مش مجرد شوية شعر في وجهك واذا ربيت لحيتك وقصرت بنطلونك وما اتصرفتش بما يقتضيه عليك هذا المظهر فلحيتك قذارة في وجهك !!"
اقصد بالرغم من دعوتهم للموضوع ده بالحسنى لكن من باب تربيتهم للأخوة الشباب بيعنفوا بشدة :Ooohtu: اللى بيعملها ومش بيتصرف بمقتضياتها !!
وبغض النظر عن هذا وذاك فاللحية حكمها عند الرجال واجبة ويؤثم حالقها !
طب بعض الناس بيقولوا ان اللى بتلبس النقاب بتبقي غاوية"منظرة" وبتهتم بالمظهر وتترك الجوهر !!
احنا لم ندخل في نوايا وسرائر الناس حتى نحكم عليها هكذا والاهتمام بالجوهر في تزكية نفسه وعباداته -واكيد احنا لم نراها بالكلية- وحتى لو رأيناها مش احنا اللى نحكم عليها
وربنا سبحانه وتعالى بيقول
{إن أكرمكم عند الله أتقاكم}
انا عن نفسي لما بشوف واحدة ملتزمة اكتر منى بقول يا ترى هل انا أكرم عند ربنا أم هى؟
وهل اللى انا اخترته كشكل لنفسي مثلا فيه تقوى لربنا 100% اذا فضلت على نفس حالى عشان اضمن انى اكون اكرم عند ربنا ولا لما اعمل زيها؟
وعن تجربة لما بقف مع نفسي هذه الوقفة بتدفعنى نفسى لحاجات كتير
شوفي يا اختى المفروض انك لابساه ابتغاء لوجه الله تعالى وامتثالا لاوامره يبقي تبقي مسلمة بيه وتدعى لنفسك بالثبات عليه وهتلاقي سبحان الله الصحبة الصالحة انجذبت ليكى وهتدعى لك بالثبات ان شاء الله
وان شاء الله انا وكل اخواتى هنا من اول الناس اللى هيدعوا لك بس انتى خطى الخطوة الاولى في الطريق ده وربنا هياخد بايدك صدقينى
اخوات تانيين ممكن يقولوا طب والشغل؟؟؟؟؟
اااه جينا لنقطة جميلة جدا...في اية كريمة جميلة بتقول(وقرن في بيوتكن ولاتبرجن تبرج الجاهلية الاولى)شوفي معايا كلمة( وقرن في بيوتكن) اد ايه جميلة تحسى ان الاسلام فعلا دين بيعزز المرأة وبيكرمها
تفتكرى لو زوجك قالك اقعدى في البيت ماتشتغليش هتطيعيه ولا لا 
؟
طب ده ربنا عز وجل هو اللى بيأمرك ليه ماتطيعيهوش !!!
وتدبرى معايا اختى ان ربنا قرن(ولاتبرجن تبرج الجاهلية الاولى) بالخروج من البيوت ومخالفة امره بالقرار فيها
وانا مش بقولك خليكى في البيت محبوسة لحد مايجيلك كبت...لا ابدا....
اسلامنا عمره ماكان دين شدة وعنف بينا وماكان الله سبحانه وتعالى ليكلفنا مالا نطيق
انتى مأمورة انك تتعلمى(طلب العلم فريضة) ولكن تلتزمى في خروجك بالضوابط الشرعية كغض البصر وعدم الخضوع بالقول وعدم الاختلاط
والنقطة الاخيرة (عدم الاختلاط) كلنا للاسف مش عارفين نحققها لانها موجودة في كل حتة في الكلية..... في الاسواق.... في الشغل.....انا دلوقتى مش بناقش فرضية النقاب بس بفكر معاكو بصوت عالى
لذا كيف السبيييييييل؟؟؟
واقولك يا اختى عليكى انك تنفذى الاية بشكل متحور شوية بانك تبقي برة بيتك زيك كأنك جوة بيتك.....انتى لما بتكونى في بيتك حد بيبقي شايفك...لا...الجدران والستائر والاغطية مغطياكى......طيب نفذى الاية بقي اخرجى وانتى متغطية
فعليكى بالحجاب الكامل...اللى ينفذ لك الاية ويحفظك....
طب في الشغل اضمنى لى انه مايبقاش في اختلاط وانا اقولك اشتغلى...هو عموما انتى مش مأمورة بالشغل لانك ملزومة من زوجك-ان شاء الله- واهلك بانهم يصرفوا عليكى
فان كان ولابد اوى فاشتغلى واقتضت ضرورة واحفظى نفسك بنقابك وان شاء الله ربنا هيحفظك
السلام عليكم ورحمة الله وبركاته