قصيدة لاحمد طاهري الملقب بالزهراني يمدح فيها مدينة قسنطينة
قسنطينة بهرتني من اول نظرة**بلاد الهمة والعلم ناسها ابطال
بين جبال مرفوعة نعت الزهرة**داخل بستان يجذب عقول الرجال
مدينة الجسورمن يقصدها يبرى**من الهم واتزول عليه الاعلال
نسيمها فواح بروايح طيبة عطرة**ارض العز والفخر والمجد والدلال
واللي يقصدها وايزورها اول مرة**ماعادش يصبرعلى زيارتها محال
بلد العلم والعلما نالت الشهرة**حبها راسخ في العقل والبال
واللي بقصدها خوتي ايدور يقرا**رب ايوفق للخير يسعى واينال
رجالها معروفين بالنيف والنعرة**اهل الجود والميعاد مزينهم بخصال
ارضها خصبة وجبالها زينة خضرة**وماءها طيب صافي عذب زلال
فتياتها زينات مثقفات تفهم واتقرا**غاية في الاخلاق وفي الجمال
شبابها ايمارس كل الاعمال الحرة**يحفظهم خالقي المولى المتعال
فيها شبان يدرسوا العشية والبكرة **يطلبوا في العلم زينين الفعال
عين الباي يالاحباب ليها نظرة **وجبل الوحش وزيد رحبة الاجمال
وحي القصبة القديم عندو شهرة**فيه الصناعة والحرف معروف مزال
وسوق الخروب اذا زرتها اول مرة **ماعدتش تصبرعنها من المحال
وعين اسمارة ناسها زينين العشرة**يكرموا الضيف طيببين نعم الرجال
مساجدها مشيدة ياسر بالكثرة**رجالها في وقت الشدة ابطال
جامعة الاميرفيها طلاب ياسر تقرا**خرجت مدرسين نعم القدوة للاجيال
والجامعة المركزية هي الاخرى**مركزا شعاع للعلم عليها الاقبال
والكتاتيب وقت المساء مع البكرة **تعلم في كتاب الله الرب المتعال
فيها جسر سيدي مسيد ماننساهش بالمرة**عالي مرفوع مشدود بالاحبال
وجسر سيدي راشد صلب كالصخرة**ممر للسيارات والشاحنات يارجال
ربي يحفظ اهلها يرزقهم المسرة**يجود عليهم بالخير والبذل والنوال