السلام عليكم و رحمة الله تعالى و بركاته مرة كنت في bus و كانت راكبة وحدة خلفي تهدر في التليفون مع واحد شكون هذا الواحد الله اعلم مانظلمش المهم من هدرة لاخرى بدات تهدر على خوها قالتاو راهو خدام و عند الامكانيات باش يتزوج و لكن ماهوش حاب و في الدار الام الاب و الاخوة و الاخوات يحاول فيه باش يتزوج و هذا الراجل فوق 35 سنة (حكات كلش bus كامل عرف قصتها ) ولات قالتلو معليش ماهوش حاب يتزوج المهم نديرو عرس و نفرحو و في الغدوة يرجعها لدار بابا و قالتلو نجيبوها عانس فوق 30 سنة راهي تقبل بيه و نفرحوها تلبس la robe blanche تنحي السخفة و تهدر عليها بطريقة قلقتني انا هنا هبطت من bus راح الحال عليا و كان لازم نهبط و الا كنت كملت معاها و نهدر معاها مليح لاه حكيت القصة هذه ؟؟؟ هذا كامل على كلمة عانس المجتمع اللي دار عمر الزواج وواكتاش يتأخر الزواج انا نفضل كلمة عزباء لانو ماكنش عمر للزواج و الا علاه رانا نسمعو هذهوحدة تزوجت في 40 سنة و اول مرة وراجلها تاني اول مرة يتزوج يعني ماهي الزوجة التانية و راجلها ماهوش مطلق ... كل شي بالمكتوب اللي يتزوجو في 18 و الا في 25 و الا في 35 سنة و الا في اي عمر ربي اللي كتب هكذاك ربي اللي كتب ماشي الطفلة جميلة و الا كي راهم يقولو ذوركا شطارة انا اللي جيبتو هكذا كاين اللي صاحبو و صاحبو و لكن مازال ماتزوجتوش لانو المكتوب مازال ماجاش ماشي شطارة ان شاء الله نبدلو هذه الكلمة من حياتنا و تاني نعاونو باش نحويها من المجتمع تاعنا ربي ان شاء الله يرزقك الزوج الصالح لبنات المسلمين كامل و الزوجة الصالحة لاولاد المسلمين كامل ربي يوفق