احوال بلادنا يا شعب الزين
شعبنا فنيان خليكم نايمين
ما خدم مازاد في العقلية نعسان
ما تفلح قاعد يستورد جيعان
البطاطة والبصلة جبنها من لسبان
خردوات زينا بيها المحلات من الصين
دووات فاسدة من اروبا تمدت للولدين
لبسين شيفون اطنان جيتنا من المريكان
تغلقت مصانع تخدم فيها الشبان
عيشين في الفوضى كي الحيوان
ابطالنا حررة لبلاد خلونا مستقلين
بسم الثورة خرج كلهم معطوبين
مجاهدين بلالاف منهم مزورين
مسؤولين ماخدموا شعبهم سراقين
رواساء بلديات على مصالحهم واقفين
فالمساجد اول الصف خاشعين
فالانتخابات اوعدوك كلهم منافقين
امام العدالة تقول نديهم الكل مشنوقين
الاساتذة كل عام مقرفين
اخر السنة كل الطلبة ناجحين
تعمر الجامعات بالمبغلين
تحط في وسطهم القاريين
اقلولك نسبة النجاح اربعة وخمسين
لاصحة لا شفى للمواطنين
لمريض بسكر مايلقاش لنسولين
لي حكموا الرماد يعمى في العين
لمراة كي تولد اقطعوها من الجيهتين
لمريض بالسرطان يدوه للمقبرة فالحين
اقلولك نسبة الوفيات انخافظت الى عشرين
لاعدالة لاقانون الموطنين كلهم مساجين
تبذر في اموال الشعب مظلومين
تسرق في الملايير تبرئهم مجانين
صحافي اقول الحق يصبح من المعدومين
مليون سكن ما تحقق في تسع سنين
وشعب بين المطرة والطين
اذا زلزلت منكوبين
اذا مطرت واحلين
اذا تحرقت كلهم هربين
اذا تفجرت ماهم مسؤولين
للعهدة الثالثة اخططوا واقفين
لتغيرالدستور كلهم سهرانين
فالبرلمان عينيهم مغمضة محصنين
تصوت على قررات ما هم مطالعين
خلاصهم بتلاثين بش يقعدو ساكتين
مشاريع بلادنا معطلة الى يوم الدين
شبابنا المقهور حارق يكل فيه السردين
بناتنا في الكبريهات متصكعين
الباقي عل لحبوب والمخدرات عيشين
بعضهم دار مؤسسات على اوهام خسرين
لي ما كسب افكار عند لحيوط واقفين
وشياطين عند لحدود مهربين
ثروة بلادنا تستغل فيها لخرين
نرفعوا لعلام نقول مناش مستقلين
الوطني فينا رافع يد لرب العالمين
طالب ربي يشفع على المؤمنين
يرفع الغبن على هذا الشعب الحزين
ابن الاوراس دزيري ماليك