[بصمة قلم]

المشاركة الأصلية كتبت بواسطة عائشة الجزائرية

لمادا الجنبين gwarلمادا هم متطورين ومتقدمين علينا
واحنا عرب دجيما توالا وفي اخير ومتخلفين تحكم فينا عادات وتقاليد هادي
whey??!!

اسمهم الأجانب وسأعطيك بعضا من أسباب تقدمهم وبالعامية كي تستوعبي :
1- بكري كان الغرب عايشين تحت رحمة الكنيسة جمدت عقولهم ومنعتهم من العمل ومن اي حجاة بعيدة عن سلطتها وبعد احتكاكهم بالمسلمين عرفوا مدى الحرية والتطور اللي موجودة في ديننا وبداو يخدمو باش يتحروا من عبودية الكنيسة واداو من الحضارة الاسلامية علومها وكانت هذه بداية التقدم و التفكّر والبحث عندهم (أوّل سبب ما عندو حتى علاقة باللبسة)
2-ثاني سبب يا عائشة الاجنبي كي تقولو الخدمة تبدى على الساعة 8.00 يجي على الثامنة مش على 8.05 , الغربي يعرف باللي دقيقة تعمل الفرق في اي حاجة بالصح حنا أمة خلي برك دقيقة وش رح دير (كيف كيف حتى هذاما عندو حتى علاقة باللبسة)
3-الغربي ياعائشة ما يجيبش ولد عمو ولا ولد خالو ولا صاحب خوه ويخدمو وهو ما عنده حتى مستوى على جال يعرفو, الغربي يحتاج مهندس يجيب اكفأ مهندس , مش يدير مسابقة ومن بعد يوقع فيها نحي هذا ونحي هذا وخلي وليد عم المدير يحكم لبلاصة يخرب الدنيا علىخاطر لاعلاقة بالعمل (وين راهي اللبسة والعادات والتقاليد هنا يالالة عائشة؟؟؟؟؟)
4-الغربي ياعائشة ما يسرقش الاوراق من المكتب وما يديش الحديد من المصانع وما يديش وما يديش ومايديش ..... الغربي علابالو هادي امانة وملك الدولة ولا ملك صاحب العمل بالصح حنا الله يبارك ما يخلي والو ما يديهش يقلك خلي ندي الناس كل تدي ومن بعد كي تخلى الوزينة يبيعوها للغرب المتطور (قوليلي وين راهي اللبسة والعادات والتقاليد هنا يا رحم باباك)

5- الغربي ياعائشة ما يدخلش للخدمة بجورنال وكاس قهوة والنساء عندهم ما تجيش تحكي قصة حياتها ع الصباح الغربي يدخل يخدم وما يتحركش من بلاصتو حتى يخلاص وقت الخدمة بالصح عندنا حدث ولا حرج (كاين لبسة هنا ولاتبانلي برك ؟؟؟؟)
6-الغربي ياعائشة كي قرا يقرا باش يطلعالمستوى مش باش ينجح وهو فارغ ما يعرف والو , الغربي ما يغش ما يسرق حتى حرف خاطيه في الامتحان
7-نزيدك هادي برك ياعائشة على خاطر راني مزروبة ضرك , في اليابان وشكون اللي ما يعرفش ما اليابان كي يدخلو الصابح للخدمة عندهم عبادة يأديوها متمسكين بيدنهم حتى اذا راهو غالط المهم راهم محافظين على هويتهم وتقاليدهم وهذا من اسباب تقدمهم ماشي تخلفهم يا لالة عائشة

احنا تخلفنا على خاطر تبعنا الغرب بلا فهامة ماتبعناهمش في الخدمة والصرامة والامانة اللي المفروض هادوك هوما أخلاق المسلم , لاتبعناهم في العري والسرقة وسوء الاخلاق تع الناس اللي هوما راهم يحتقروهم ويحاربو فيهم
تبعناهم في سفاسف الامور وخلينا الصح

تخلفنا على خاطر خلينا وش قالنا ربي سبحانو وبدينا نتفلسفو من عندنا

التطور ياعائشة مش اني نمشي نصي عريان في الطريق والناس تشوف ليا لو كان جا هذا هو التطور مالا نقولو للحيوانات الله يبارك عليكم راكم في قمة التطور

التطور يا عائشةماهوش في لبس الماركات العالمية اللي ما توالم حجابي الاسلامي وما عندها حتى علاقة بيه, التطور اني نحافظ على هويتي الاسلامية ونفتخر بيها كيما هوما يفتخروا بمعتقاداتهم وتاريخهم

التطور مش اني نعوج فمي ب merci w why واللغات اللي راكم تشوهو فيهم وتكسروا فيهم زعمة زعمة تقدم , التطور ياعائشة اني نكون متمكنة منهم بالصح محافظة على لغتي وهويتي وما نستخدم هاد اللغة الا اذا احتجتها

التطور ياعائشة مش اني نقول اناايمو وافتخر , التطور اني نقول انا مسلمة وافتخر افتخر بديني وبحجابي وبعزتي وكرامتي

قبلما تهدروا على التطور افهموا معنى التطور وافهموا علاش الغرب تطور ووعلاش المسلمين تخلفوا بعد ما كانوا اسياد العالم افهموا باللي التقليد الاعمى اللي غزانا هو أكبر اسباب التخلف افهموا باللي العقول اللي اخر تخمامها اللبسة والحرية المزعومة والكاذبة هي اللي رجعتنا للوراء وخلاتنا عايشين في تخلف