[الجازية الهلالية]

احنا في سيدي علي بخاسك كيفكم

المهم غادي نزيد نفصل شوية

نبداو بالعريس نهار لول عنده عشا يديره لصحابو وفاميلتو نسموه العامة ويكون نهار ذبيحة الكبش يطيبو فيه دوارة وبوزلوف وحريرة وسلاطة

الغدوة من داك يروحو يديرو الحنة للعروسة ويدو معاهم الجهاز لي فيه روايح وقش -الجلابة والسباط-المنسوج-المنصورية-بلا ما نذكر لخرين المعروفين

نهار الحنة العروسة تعرض غاشيها والجوارين ومن بعد تخرج بالشدة ومعاها زوج بنات رافدين الشمع مين يدرولها الحنة يبرحو بالجهازوبالذهب -هادي من دار

راجلها هادي من دار باباها-



مين يروحو غاشي العريس يديرو الحنة يحطولهم السفة لي هي طعام بالسكر ومن بعد يروحو لدارهم باش لغدوة من داك يجو يدو العروسة

ومين يدرو العروسة الحنة وتكمل يغطسو هادوك الشمع في الحليب ويعطوه للعزبات يشربوه

بالنسبة للعروسة دير التgصيرة نهار قبل الحنة تعرض فيها لعزبات ونهار لي يجو يدوها تروح معاها امها وخواتاتها والتباعات لي يكون دايما عماتها وخلاتها

والعراسات لي يعرسو في نهارهم ويجو

ودروك نهار لي يدو فيه الطفلة تخرج من دارهم دايرة البرنوس يديرولها كورتاج ومعاهم العيساوة ويزوروها في الوليا احنا عندنا سيدي عفيف وسيدي علي ومين

يوصلو لدار العريس يخرجوها من اللوطو بالبارود

ومن بعد ينزلوها تريح شوية ويدخلوها عند الغاشي لي جاو يعرسو وتما يبرزوها والخطرة لولا كاع يوقفوها ويقعدوها في الكرسي 7 خطرات

من بعد يجي الحزام يديرولها بلوزة بيضة والملحفة ويعصبولها راسها من بعد تقسم الحلوى والسكر على الدراري ومن بعد ترفد طفل صغير ودرو بيه يقولو باش ولدها

اللول يكون طفل

وفي الليل تكون الدخلة يجي العريس مع صحابو من برا يجيبوها فوق العود مغطي بالبرنوس والبارود يضرب يتمشى وحد المسافة تاع 20 مترا

لغدوة من داك مو العروسة دير الفطور عند دار العريس لي هو الرgاg وفي هاداك الصباح يجيبو للعروسة تغسل الحوت ماعلاباليش علاه

وتدي العروسة معاها دي كادو تعطيهم لغاشيها تاع العريس

ومين تولي مو العروسة لدارها يديرولها قفة ماعلاباليش شافيها

واسبوع من بعد يديورلها الحمام