[ام ظافر]

انا رايت الكثيرات من السيدات يطبخن في الاعراس وقلن لي ان سر البنة هو اللحم الجيد والبصل تكثريه قد ما تقدري هذا على الكسكس والشخشوخة وووالمعجنات اما الحريرة يضاعفو معاها الخضر وخاصة طماطم تاع الحب
ولاحظت ان ماكلة واحد السيدة بنينة بزاف وقالتلي كي تقلي اللحم مع البصل ديما زيديلو شوي فلفل قرون حار وشوي طماطم حب وما تخافيش قليهم يعطيو بنة للحم وللمرق ودارت في ماعون العرس الكبير جدا الي يرفد فريسة كاملة تاع اللحم دارت 2 قرون فلفل حار و3 حبات طماطم وما جاتش المرقة لاحارة ولا حمرا وكان طيابها جد بنين
وفي شربة الفريك اظافت في الاخير شوي نعناع يابس اعطى نكهة مميزة ولالالالالازمك الطماطم تاع العلب المصبرة تكون من النوع الجيد هي الي تتحكم في بنة الشربة
اماعلى اللوبيا ماشطو طيبيها عادي وفي الاخير ارحي بالمهراس جيدا عقدة وارميها واطفي النار وغطي على القدر هذه العقدة مفعولها مثل السحر وتتكون من(شوي دبشة يعني قصبر خضر وشوي ثوم) هرسيهم مليح مع ذرة ملح وشوي طماطم تاع الحب خاطي المصبرة اضيفيها مرحية على الثوم والدبشة و خلطي مليح واظيفي على اللوبيا بعد ما طيب وخلي زوج دقايق وطفي النار مهما كانت الماكلة تاعك هذه العقدة تبننها
تكلمت لك اختي على سر البنة الهايلة لاني حظرت للعراس وكل الطباخات يطيبو الاكل بكمية كبيرة ولكن ماشي كامل ماكلتهم بنينة
لذلك اعتمد على الاخوات حتى يعطيوك الكمية لاننا ما نطيبوش في الاعراس حنا اللوبيا او الحريرة نطيبو غير شربة فريك والكسكس او الشخشوخات بكل انواعها
ربي يعاونك وتفوت صايبتك على خير