انا ندير 4 كيلات فرينة + كيلة سمن المدينة + كيلة ماء وماء الزهر مخلطين نحط كامل المقادير في جفنة الفرينة الأولى اومبعد السمن ثم نطم بالماء نقدر ما نحطش الكمية قاع تاع الماء مرات جي جارية ومرات تشربه على حساب الفرينة لي شريتي ولازم عليك تعجنيها مليح مليح وتقسميها على 3 او 4 قرصات وتخليها ترتاح نصف ساعة تقريبا تاخدي عجينة وتحليها أولا بالحلال ثم تاخدي ماكينة العجين تحلي العجينة مرة أخرى يجيو طوال طوال تتحطي العقدة تاع اللوز الي متكونة من 3 كيلات لوز 1 سكر شوية قرفة وملعقة سمن دائبة وماء الزهر باش طميها وديري مثلثات كي تمكلي ااقليهم في الزيت بصاح ما تعسليهم تم تم خليهم يقعدو حتى الغدوة من داك باش الصمصة تقعد مدة طويلة تقرمش هده هي طريقة لي جربها مئات المرة من وقت كنت في دارنا مع يما وحتى اللآن لي راني في داري بولادي ان شاء الله نكون قلت كل شيء وأي استفسار راني هنا