[ziar]

الشــــــــــمعة

يَـا شَــمْعَة لَلَّـهْ مُـــــرَادِي نَــــــــــفْهَمْ آشْ مْـسَيَلْ دَمْـعْتَكْ قُــولِي وَعْلاش
يَـا ذَا الـجَــــارْ بْـجَـــاه مُـولاكْ تْـــكَلَّمْ بَعْدَنْ [1]شَــفْتْ أَنَا حْـوَالَكْ مَا نَهْنَاشْ
إِذَا كـانْ الـمَـوتْ بَـيْنْ هْـلَكْ [2] حَـــوَّمْ مْـصِيرْ الْخَلْقَة كُلْهَا تَــرْكَبْ لَـنْـعَاشْ[3]
رَبِّـي رَايَـدْ هَــكْذَا لَعْـمَارْ الـتَّـــم[4]ْ لِـيهْ الـطَلْبَة بِـالـصْبَرْ مَــا يَـبْخَلْنَاشْ
ويْـذَا سَعْدَكْ خَـابْ وَالـفَلْكْ تْـــبَرَّمْ[5] مَنْ بَـكْرِي ذِي خْـصَايْلَهْ مَـا تَخْفَانَاشْ
الـدَنْيَا كِـيهَاكْ تَــصْحَى وَ تْـــــغَيَـمْ بَعْدْ قْـوَايَلْ [6] حَامْيَة يَهْدَفْ رَشْـرَاشْ
عِـيدْ عْــلِيَّ جَـاهْ رَبِـي لا تَـــكْتَمْ رَاهْ سْـكَاتَكْ هَـوْضْ[7]عْـلِيَ لَـوْحـَاشْ
جَـــاوَبـْـنِي لله مَـانِي جَـاي ْنــذَمْ[8] وَاشْ يْـذَمْ اللِي بْحـَالِي فِي كَـــمَاشْ[9]
قَـالَتْ وَ سْـمَعْ وَاشْ قَـالَتْ يَـا فَاهَــمْ وَ تْـنَبَهْ لَـحْدِيـثْنَا لا تَـــــتْسَهْـزَاش[10]ْ
قَـالَتْ كَانْ هْـدَاكْ رَبِـي يَـا مَــسْلَمْ خَــلِينِي فِي حَالْـتِي يَـدْزِي[11] تَـنْبَـاشْ
رَادْ عْـــلِيَ خَـالْقِي وَالــوَقْتْ حْـكَمْ جْعَلْ مَنِي جْـلِيسْ للِي هَـمُه حَـاشْ[12]
نَــنْفَقْ مَـنْ عَـزْ الـمْكَاسَبْ وَ ْنــسَلَمْ نْفَاجِي عْلى اللِي حْرَمْ نَوْمُو مَا جَاشْ
وْنَـاسْ بْـلا وْنـِـيسْ مَـنْسِيَة فَــالــْهَمْ صَهْرْ اللَيْـلْ مْهَشْ عْـضَامِي تَـهْشَاشْ
النَّاسْ تْـزِيدْ فَـالْوْفَى[13] وَ أنَــا نَـرْجَمْ مَنْ لَـيْعَاتْ النَارْ رَانِي عَـوْضْ فْرَاشْ
ذَا المَشْعَـالْ يْبـاتْ فِي لَــحْمِي يــَـلْطَمْ شيِ فَاضْ وْشي معاشْرُ غَي بَالتَلْكَاشْ
يا سَـايَلْ جـهْدْ الجـْمَرْ قــَاوِي يَـهـْزَمْ وَالجُـهْدْ إلاَّ جُـهْدْ رَبِـي مَا طُــقْنَاشْ
يَـاشَـمْعَة بَيْنِي وْ بَـيْنَكْ كــَمْ وْ كَــمْ وَالـبَـيْنْ[14] اللِـّي بَـيْنـَا مَا يَـتـَّــحْصَاشْ
قَارَنْ بَيْنْ شْـعَابْ وَ الـوَادْ إِذَا عـَـمْ[15] وَاشْ يْجِيبْ النِيلْ لَمْوَاجَنْ[16]عُـطَّاشْ
لَوْ حَـالي مَنْ حَـالْتــَـكْ نُـُــشْكُرْ دَايَـمْ سَعْدَكْ يَا مَنْ مُتْ دَافِي فُوقْ فْرَاشْ
لَـوْ نَـبـْدَى فَـالْلِّي اعْــشَرْنِي وَ مْــلازَمْ تـَنْسِى مَنْ هُـ بِـيكْ وَ تْـجِينِي فَـتــَّاشْ
لَـوْ نَـحْـكِيـلَكْ عـَـلـْتِي يَـنْطَـــقْ لَـبـْــــكَمْ يَتـْحَتَّتْ صُلْبْ الْـحْجَرْ مَـنْهَا يَـهْشَـاشْ
إِذَا نــَــبْكِي نْـجــُـوعْ عَــنـِّي تَــتــْلايَـمْ يَـشْفَعْ لَيـَّا عَـاذْلِي مَنْ بَعْدْ الـتَغْشـَاشْ
ضُـرَكْ ضـُـرْ مْـنَاوْبَة[17] مَــاهُو دَايَـمْ وَانَـا ضُـــري مْلازْمَ الـكـَبْدَة قَـدَّاشْ[18]
ضُـرَكْ بَـايَنْ كُلْ مَنْ شَـافَكْ يَـفْهَمْ وَ أنَا قُرْبْ[19]الـنـَاسْ ليَّا مَا يَـدْرَاشْ
أَنْـتِ تَـحْتْ الـنـَـارْ جَــلْدَكْ يَـتــْــلَطَمْ وَأنَا نـَارِي فِي دْخَالِي[20]مَا تَـطْفـَاشْ
يَـتْخَـالَجْ لَـحْـمِي بْـحَــبَاتْ الـسَــاشَـم[21]ْ سَالْ عْلَى الْبَارُودْ جـُرْحَهْ مَا يَبـْرَاشْ
حَالَتْ طَـــيرْ جْــريِحْ يَـتْخـبَّطْ فَـالَدَّمْ وَاشْ بْقى للطـَيْرْ مَنْ بَعْدْ التـَرْيَاشْ[22]
جُـرْحِي بَـعْدَنْ طـَـــالْ بِيــَّــا وَاسْـتَوْرَمْ سْكَنْ في لُبْ العْضَى[23] عَاشَرْ لَحْشَاشْ
خَـلانِـي قَـفَّيتْ شَـــاوَنْ [24] جــَـا زَادَمْ وَلْـزَمْ لَوْمَا فْـنِيتْ يَـعْـشَرْ مَا يَـفْنَاشْ
رَاهْ هْـدَانِي مْـثـِيـلْ صُــوفَة تَـــتـْبَشَّمْ تَـتْـلاوَحْ مَا بَـيْنْ كَــفَاتْ القـَرْدَاشْ[25]
احْـمَلْ بِيــَّا سَـــيْلْ مَـجْـهَدْ جَــا عَــايَم ْدَرَعْ بِـيـَّا فِي بْحَـرْ هَـايَجْ مـُوحَاشْ
وَاشْ يْـقــَدْ سْـفِيـنْتِي لِـيهْ تْــقــَــاوَمْ بَعْدَنْ طَاحْ قْلاعْهَا[26]وصْبَحْ قُشْقَاشْ[27]
تَــتـْـقَاذَفْ لَـمْـوَاجْ بِـيْنَا تَـتْلاطَـــــمْ وَانَـا عُـقْبْ لـْـوَاحْهَا[28] دِيْـمَهْ فَتـَّـاشْ

[1]بعدن = بمعنى بعد أن

[2]هلك = الأهل

[3]لنعاش = جمع نعش

[4]التم = تنتهي

[5]اتبرَّم = بمعنى التفت أو تغيَّر

[6]قوايل = جمع القايلة = و هي الشمس

[7]هوض أو هيَّض = أثار و أيقض

[8]انذم = من الذم

[9]الكمَّاش = و هو الفخ

[10]لا تستهزاش = لا تستهزئ

[11]يدزي أو يزّي = يكفي

[12]حاش = عاد إلى سابق عهده

[13]الْوْفَى أ الوفيان = أي طول القامة

[14]البين = البعد أو الفرق

[15]عم = بمعنى فاض

[16]مواجن = حمع ماجن وهو ما يشبه السد

[17]مناوبة = متقطع

[18]قدَّاش = متواصل ودن انقطاع

[19]قُرب الناس = أقرب الناس

[20]الدخال = الجوف

[21] الساشم = حبات صغيرة من الرصاص تحشى بها خراطيش بندقية الصيد

[22]الترياش = نزع ريش الطير

[23] العضى = الأعضاء ( لحشاش = سويداء القلب )

[24]شاون = بمعنى أول ما

[25]القرداش = آلة تقليدية لمشط الصوف

[26]القلاع = الشراع

[27]القشقاش = القش

[28]لواحها = أي لوح السفينة المتناثر