[المتفائلة الصغيرة]

ارواح تشوف واش في الكلاسة كل واحد حاكم بلاسة

في كل طابلة دوبْلوفاي و السّوجي راهو في الطريق جاي

الأستاذ دخل كيالقارْد كور و بقى بين الصفوف يدور

راهو دخل مرفوع الهِمّة مْوَجّد روحو للمهمّة

صايي دُرْك وصل السّوجي واحد ما يقدر يْبوجي

ندَشْنوها بالسؤال اللّوَّل دماغ حابس و دماغ معوﱠل

عين آي خرجت في الورقة و اخرى تحوّس على السّرقة

لازم الخدمة والسّيلونْس لازم المخ ولانْثيليجونْس

وليﱢ عازم على الكوْپياج لازم يكون عندو الكوراج

حتى خطأ و صحيح ولّى عندها شانْ صحيح

آيّا قلبْها ْطرَق و طْرَق و يا ربّ جيب الحق

نْوَلِيوْ درْك للدّوزْيام غير ماكلاّه التّخمام

اذا عرفت تبداه ماتكملوش يخلص الوقت و ماتحلّوش

الله غالب تمرين صعيب و الحل ماعندك مْنين تْجيب

الأستاذ حاط عينيه عليك و كون تتحرك يجي ليك

زيد شوف التمرين للّي مازال قبل مايزيد يفوت الحال

واذا شفت الأستاذ مدوّر ازرَب حوّس كَشْما تدبّر

شوف قدّامك شوف وْراك و أثُونْسْيُو تخلّيه يراك

سينو راهي تثّفرﱠْ فيك و ما رايحة تجي غير عليك

تشوف في الورق كامل معمرين وتاعك فارغة و ربّ يعين

ضامن عشرين تحت الخط بصّح من الفوق الزّيرو يْتحَط

غير ماكَلاّه تكْسار الرّاس نوضْ خرج الوقت خلاص