[*blanche neige*]

بليله هدير العواصف ما هِدي مجنون
دقدق على بابي! و ضيف تقال دقاتو

والريح صوتو تركني برهبتو مسكون
زارع بعيني أرق ، من جوع سطواتو

و الثلج يللي تركني بغرفتي مسجون
تارك بقلبي البرد من كتر زهماتو

(مترين) عالي أمام البيت مش ممنون
حتى ( بخار الثلج ) زايد في هجماتو

تا صرت قرب ع نار الموقدي وعيون
تقشع حبيب القلب على الموقدي بذاتو!

يا ليل ارعن تركت عيون تحكي ظنون
و تسأل عليها بجنون الليل عتماتو

يمكن بعيدي ، ويمكن وحيدي تكون ؟
والقلب ، يمكن ماعاد يشوف غمراتو

بردان قلبي انا،و على بعد الأحباب محزون
لما حنيني اشتعل ، برماد جمراتو

مهما يا ريح الشتي تهمدر ما فيك تمون
ما بظن صوتك خفى ، من القلب نبضاتو

بقلبي هدير الهوى وحب الحبيب بصون
و عواصف الثلج ، ما بتقوى على لهباتو

تعرف ؟ .. بحب الليالي يكون فيها سكون
و همس الحبيب ، بجمال الليل همساتو

بنظرة عيون الحبيب ، كل الالم يهون
و الرمش ، ياما شفاني بطيب تعبيراتو