[Mariana369]

السلام عليكم 😇


حاجيتكم ماجيتكم ... وبالمسك رشيتكم ... ومايحلا الكلام غير بالصلاة على النبي العدنان عليه أفضل الصلاة والسلام ...

يحكيو بكري قالك يا سيدي كان كاين تاجر من التجّار الكبار في البلاد... معروف في الشرق و الغرب ... خدّام و كل نهار من سوق لسوق و من مدينة لمدينة ... و كل نهار قافلة ماشية للجنوب تجيب التمر... و قافلة للساحل و قافلة للشمال... و حتى القوافل خارج البلاد للشام و مصر و حتى بلاد الهند و السند... و معروف بالأعمال الصالحة و يعاون الناس و ما يبخلش على الزوالي ...😊

هاذ التاجر إسمو سي محمد، عندو طفل كبر بالشوي بالشوي و تربى في الخير و العز لعينيه ... و تعلم من باباه أصول التجارة و المعاملات... لكن ما الدايم غير وجه ربّي سبحانو ولحق النهار لي سي التاجر محمد مرض و مات😢... وصار على ولدو لازم يشد بلاصة بوه ... خدم و تعب و شقى و تهلا بكل شيء... و زاد تزوّج بطفلة سبحان الخالق زين وعين ... 🥰

و لكن بعد وقت قصير سي ولد التاجر بدا يضيع ، و تعرّف على أصحاب السوء و بدا يسهر الليل و الصباح يصبح راقد 😮... و ضاعت تجارته و قوافله و رزق بوه المرحوم بدا يضيع و هو لا خدمة لا زدمة... النهار بطولو راقد وزادت عليه مرتو لي ما تنهيه على هاذ المنكر ، ما تحمد ربي ما تشكرو... فردة و لقات أختها😒، و كيف ما قالو ناس بكري: إجبد ما ترد الجبال تتهد ..

حتى رقد و صبح لقى روحو ما يكسب حتى دورو، و حار واش ياكل، و مرتو لمت قشها و مشات لدار بوها و خلاتو وحدو، قاتلوا ما يساعدنيش نعيش معاك في الفقر و الميزيريا🙄.. و زيد صحابو هجروه و بقى وحدو حتى وصل ولى يمد في يديه قدام الجامع😔 ...

تعب و تعذب و رقد برا في البرد و جاع مالقاش واش ياكل، راح عند راجل كان صاحب بوه قبل، و طلب منو يعاونو و يوقف معاه، صاحب المرحوم شفق عليه و قالو من اليوم تولي تخدم معايا النهار بطولو في الحانوت تبيع و تشري... و في الليل تبات في الحانوت و نخلصك بالزايد ، المفيد تولي صالح و تخدم على روحك🙂، خاطر بوك راهو كان إنسان فضيل الله يرحمو ...

بدا ولد التاجر يخدم و تحسنت أحواله، و نهار قرر باش يمشي في قافلة للجنوب باش يجيبو التمر و الدڨلة، مشى معاه عشر رجال و قصدو ربي للجنوب ... وصلو للصحراء و حكمتهم عاصفة رملية و ضاعو وسط الصحراء لا ماكلة و لا ماء😧 ... كانت الصحراء و الشمس تحرق فيهم، جاو تحت نخلة و قالهم إقعدوا هنا استناوني و أنا نمشي نشوف كاشما نلقا بير نتاع ماء ولا بيت شْعَر ( خيمة ) ..

هاو ماشي هاو ماشي في قلب الصحراء و كثبان الرمل تحرق... حتى ولى يمرد ( يحبو ) على ركايبو و حتى شاف من بعيد بير ... كي وصل للبير لقى راجل شايب كبير لحيتو بيضاء و لابس الأبيض واقف قدام البير.. و لقى ولد السلطان كان يصطاد في الصحراء و ضاع ... و قالهم الشايب ما نعطيكمش الماء و مفتاح البير حتان تجاوبو على هذ السؤال :

وشنو خيار الطعام ؟ وشنو خيار الأصحاب ؟ وشنو خيار اللباس ؟ وشنو خيار الزواج ؟ 🤔........

قام ولد السلطان و قال : خيار الطعام اللحم و الخضروات و الغلال و الفواكه ... و خيار الأصحاب أصحاب الجو و السهرات و اللعب... و خيار اللباس الحرير و الذهب ... و خيار الزواج بنات السلاطين و الفاتنات 🙄.... قالو الشايب : لا يا ولدي الظاهر فيك ما شفت من الدنيا حتى شيء، و ماكش راح تشرب ... وموتك خير من حياتك😥 ...

ودار الشايب عند ولد التاجر و طلب منو يجاوب ... قالو ولد التاجر : خيار الطعام ما حضر ... و خيار اللباس ما ستر ... و خيار الأصحاب وقت الشدة ... و خيار الزواج قرد موالف و لا غزال شارد ... قالو الشايب : الله عليك يا ولدي هاي الهدرة الزينة ، وعطاه شرب و روى حتى رجعت فيه الروح و قالو علاش جاوبت هكا ؟🧐...

قالو ولد التاجر : كنت عايش في خير و نبذر في دراهم بوي، و منبعد كي فلست عرفت إنو خيار الطعام ما حضر يلي نلقاه ناكلو و نحمد ربي على نعمتو ... و قبل وقت كنت بدراهمي كنت نشري في كل أنواع اللباس و لكن من بعد إكتشفت انه أحسن لباس هو ما ستر بعيد عن التبذير ... و قبل كانو الأحباب عليا يتجاراو و أنا كيف السلطان بيناتهم و لكن وقت الشدة ما لقيت منهم حد ... و قبل مرتي ديتها على زينها و لكن وقت الضيق خلاتني و مشات لدار بوها و عرفت انو الإنسان ياخذ قرد موالف خيرلو من غزال شارد وقت الشدة يمشي و يخليه ...✅

قالو الشايب : الله الله عليك الظاهر الدنيا رباتك و علماتك، و قال ولد التاجر نعطي معايا الماء لولد السلطان مسكين حرام يموت بالعطش و عطاه شرب و رجعو للقافلة و رجعوا للمدينة سالمين و ولد السلطان قال لولد التاجر انت كنت معايا كريم و منّعتني من الموت من اليوم تمشي معايا للقصر و نمدلك أختي ما تلقاش ما خير منك ...و رجع سي ولد التاجر مع الأمير و عاش في القصر في خير و نعمة ... 🤗

و حكايتنا طابة طابة و العام الجاي تجينا صابة ... 🍀

ليلتكم سعيدة... واحلامكم اسعد... وتصبحون على واقع اجمل
باذن الرحمن الرحيم...

🌺🌺🌺