السلام عليكم
كي تقولي بلي اذا خليتيه يترك الدراسة سيكون الندم الأكبر ( الأكبر لمن لك أم له؟ )
علاه تقولي بلي ما يقدرش يطلع المعدل من 12 ل 16؟
إذا ولدك حاب يقرأ و حاب يعاود الباك بالعكس شجعوه و قولولو تقدر علاه اللي يجيب 16 فاه خير منو؟
بالنسبة للحالة النفسية تاع الولد مانقدرش نهدر ليس مجالي ليس لدي أي خبرة إن شاء الله يفيدوك الأعضاء.
بصح نقول حاجة علاه مجتمع مريض بما هو طب و صيدلة؟ ؟؟؟؟ حابة نفهم صح صح علاه الطبيب خير من المعلم؟ و لا الطبيب خير من المهندس؟ و لا نقلك علاه الطبيب خير من الميكانيكي؟
من كثرة ما لعباد متعلقة بالطب بعثتو ولدكم يقرأ شبه طب ! عندها الحق هاذيك اللي عايراتو خاطر هي كانت تقرأ معاه و علابالها بلي المستوى تاعو ليس بمستوى لدراسة شبه طبي .
إذا كان ولدك حاب يدير صيدلة و لا طب و لا جراحة أسنان ( هو ماشي انتم والديه )
اقترحو عليه يعاود الباك و يدير دروس دعم و و و .
إذا كان هو ماعندوش رغبة في دراسة هذا المجال اقعدو معاه في طاولة و اسمعو منو هو واش حاب يقرأ.
بالنسبة ليا الندم الأكبر أنو ولدكم يبقى بلا شهادة ( راني معاك كاين شهادة من شهادة) .
و ما تخموش في العمر . السن عمرو ماكان عائق.
نعطيك مثال على أخي
أخي كان مجتهد و نهار كامل فوق الكرسي جاب المعدل 15 بالاك مادخلوش جراحة أسنان ( كان حابها )
قلق نهار نهارين من بعد هز ورقة الخيارات تاعو و رتب الخيارات تاعو و في الأخير خير إعلام آلي و رآه يعاود في الباك بصح ماضنيتش يدير حاجة على خاطر راهي عجباتو لانفورماتيك.
لازم انتم تفهمو ولدكم بلي المستقبل ماهوش منحصر في طب و لا شبه طب و لا طبلية بيضاء.
انا كنت نموت و نخرج أستاذة تخرجت خدمت أستاذة عام واحد و ربي كان عندو مخططات أخرى ليا . و مخططات ربي كانو أحسن من مخططاتي.
ربي يحفظلك ابنك و ييسر له مافيه خير.