السلام عليكم ورحمة الله تعالى و بركاته
حباباتي حبيت نشارككم بوصفة عصير اليقطين (الكابوية) لي مذاقو رائع و هو صحي في نفس الوقت والكل نعرفو فوائد الكابوية وخاصة للاولاد الصغار ..والحاجة الهايلة أنو واحد مايقدر يكشفو بلي نتاع كابوية
تحكمي طرف كابوية تنقيه وتنحيلو القشرة و تقطعيه طراف في كوكوطة صغيرة و تزيدي معاه حبات جزر (اربع او خمس حبات ولى ديري نص بنص كابوية و جزر) منقيين و مقطعين و تغطيهم بالماء و تقفلي عليهم حوالي نصف ساعة على الاكثر باه يطيبو مليح
بعد مايبرد تحطي كمية في الخلاط الكهربائي و تزيديلها علبة ياوورت (دانون عادي) و مغرف سكر كبيرة و تخليه يترحى مليح باه منبعد ماتحتاجيش تصفيه
منبعد ماترحيه الكل زيديلو عصير ليمون (حبة او زوج على حساب الذوق) و السكر ثاني اذا كنتي تحبيه حلو زيديلو واذا جاك خاثر بزاف زيديلو الماء و ديريه في زجاجات و حطيه يبرد ...
وتمتعي بالعصير الصحي ذو الذوق الرائع
بالصحة و لهنا