اقتباس:
المشاركة الأصلية كتبت بواسطة Noor Mi
شكرا لك اسئلتي كالتالي
كيف كان عام بكالوريتك وكيف كانت معدلاتك
هناك من يخاف من هذا الامتحان بالنسبة لي لا اخاف حاليا اذا صادفني هذا الشعور ما هي الحلول لتخلص منه
متى بداتي الدراسة
ماذا فعلتي في العطلة الصيفية بالنسبة لهذه النقطة هناك من يقول لي ابدئي بحفظ الشخصيات و المصطلحات لكنني لن افعل لانني اخاف ان انسى ما حفظته و لانني علمية ايضا اردت ان اراجع دروس المواد الاساسية التي نصادفها هذا العام لكنني لم اعرف اي منها اذا تذكرت اعطني اسماء هاته الدروس
بالنسبة للادب هل يطلب منكم تحضير الدرس في القسم
هل طلبت منكم المشاريع و بطاقة المطالعة
هل وضعتي جدولا للمراجعة اذا وضعت كيف قمتي يتقسيم وقتك
كيف نظمتي وقتك بالنسبة للعام كاملا
هل قمتي باستغلال العطل االشتوية و الربيعية
متى انهيت المراجعة للباك
اعلم انني اثقل عليك اعذريني لكن اصبح لدي حماس مفاجئ لنيل البكالوريا بمعدل عالي و لا اريد فقدان هذا الحماس
وفقك الله
|
السلام عليكم
ربي يوفقني في الاجابة على اسئلتك اختي
اولا عام البكالوريا كان حافلا فيه مشاعر مختلطة فيه تعب اجتهاد دموع ضحك ذكريات سهر وخصوصا هنا في المنتدى مع رفاقي وخاصة الايام الاخيره في رمضان كانت ايام مميزه جدا
بالنسبه لمعدلات الفصول ما كنتش نهتم بزاف بالفروض والاختبارات يعني ما نقتلش روحي
نقرا في ساير الايام لكن ليلة الاختبار او الفرض ما نراجعش بزاف .. المراجعة ليلة الاختبار مهمة ..راني نقول مراجعة ماشي واحد مايدير والو كي يوصل الاختبار يبدا يقرا في ليلتو
المهم كانت معدلاتي 15 قريبة من 16 وكنت كثيرة الغياب دايما فالرقابة يديرولي recherche يحوسوا عليا وكل مرة ما يلقاونيش مالفة نحقرهم ومالفه نزيد نخرج من الحصص وو ...
بصح كنت نرجع للدار من الحصص التافهة لي نحس روحي مانستفيدش من الاستاذ تاعها ونراجع في الدار
بالنسبه للخوف انا ثاني كيفك ما خفتش بزاف ماعدا الايام الاخيره حكمني ضغط رهيب لدرجة اني مانقدرش نراجع ونقرا بسبب الخوف .. وهذاك شي طبيعي ماكانش لي يقرب الباك وما يخافش
اما عام كامل الحمدلله ما خفتش وراهو ما يجيكش الخوف ضركا لانو تشوفي الباك بعيد بزاف مزال عام كامل ياحسراه
كي يبدا يقرب تبداي تديريلو حساب
و نقولك شكون لي يخاف .. اللي ماعندوش ثقه في نفسو وقدراتو هو لي يخاف كون ما يأديش أداء يرضى عليه
هذاك الموسوس كيما نقولوا نحنا يتوسوس من روحو وما يوثقش فيها
اما ان كنتِ واثقه في ربك وفي نفسك ماكيش رح تخافي وعن تجربة ، والثقه بالنفس مستمدة من الثقه بالله صدقيني .. تقربي من ربك واكثري من الدعااء لانه يغير القدر
وفرق كبير بين واحد يخاف وبين واحد ما يخافش
مثلا انا نهار الرياضيات كي عقبت الباك نحل في السوجي وانا مرتاحة عالآخر مش مضغوطة ولا اي شي
حليت نورمال وركزت
بالمقابل نهار الفيزيا خفت شوية وتخلعت ، خلطت الحالة بديت في سوجي و مبعد بدلتو ووو ... الخ المهم توترت واجابتي كانت كيما التوتر تاعي
كي تحلي بثقه مش كيما تحلي بخوف صدقيني فرق كبير حاولي تحافظي على التوازن تاعك ،
وثانيك لي يخاف هو لي مايقراش مليح ويقصر في قرايتو
حاولي تمدي مجهودك كامل ما تبخليش روحك واقراي من بداية العام باش ما تتضغطيش في الاخير وما تخافيش
اممم متى بدات الدراسة ؟ في سبتمبر ولا اخفيكِ اني قريت شوية في عطلة الصيف
قريت انجليزية و قريت الوحدة الاولى تاع العلوم .. فقط
ما ننصحكش لا بالحفظ ولا بغيره .. الباك ما يحتاجش كل هذا
الباك اسهل بكثير مما يعتقد الجميع
كون تبداي تحفظي من بداية العام وتكملي الحفظ في مارس ولا في افريل يعتبر شيئ جيد
المهم الحفظ ننصحك ماتخليهش للاخير اذا قدرتي تكملي في ديسمبر وتبقاي بقية السنة تراجعي ما تقوليش لالا
وكيف كيف كون تبداي تقراي المواد العلميه من بداية العام يكفيك الوقت
الوقت كاف جدا
إن احسنت استغلاله .. ما تضيعيش وقتك اهم نصيحة ماتضيعيش وقتك
بالنسبه للدروس لي تحتاجيها
في الفيزياء تحتاجي درس الاكسدة والارجاع .. الاحماض والاسس .. الناقليه .. في الغاز المثالي تحتاجي قانون واحد pv=nRt
في الرياضيات النهايات الاشتقاقيه المتتاليات الاحتمالات الهندسة في الفضاء
مراجعه خفيفه برك لازم تكون عندك قاعده مليحة من السنه الثانية ثانوي هذا شيئ مهم
العلوم نورمالمو تحتاجي الADN ودروسو .. وبلاك التنسيق العصبي .. انا مانيش علميه اسألي اهل الشعبة لربما يفيدوك
بالنسبه للادب ما كنتش نحضر دروسي ، على حساب الاستاذ لي يقريك مانقدرش نقولك يطالب بالتحضير ولالا
كاين الاستاذ لي يراقب التحضير ويهتم وكاين لي لالا ..
انا ماكنتش منضبطة في الحوايج هاذي كان كل همي هو الباك
تقدري ما ديريش تاع المطالعه والمشاريع اذا يخصم لكِ نقاط عادي لانو بصراحة هاذي اشياء تضيع الوقت ولا تسمن ولا تغني من جوع .. ماتهتميش لنقاطها بزاف .. ضعي الباك نصب عينيك وفقط
بالنسبه للوقت هو كان اكبر عائق ... ماعرفتش ننظم وقتي بصراحة وضيعت الكثير من الاوقات لذا مانظنش انا الشخص المناسب لي ينصحك بتقسيم اوقاتك وو .. المهم انك ماتهملي حتى مادة وحطي حلمك بين عينيك وعيشي عالمك الخاص ماتهتميش للكلام السلبي لان البكالوريا سهله جدا جدا جدا جدا
العطله الشتوية ما ستغليتهاش بزاف لظروف .. اما العطله الربيعيه نعم استغللتها الحمدلله
متى انهيت المراجعه للباك ؟ ههه ماكملتش حتى لآخر لحظه ومستحيل تقولي كملت مهما قريتي تحسي بالنقص وماتحسيش بالرضى
انا كون زادولي شهر اخر نكمل نقرا ومانقولش كملت
بلاك حتى كون زادولي عام وما نكتفيش
عندي بزاف نصائح اخرى خلي بعد النتائج باذن الله نفتح موضوع نحطلكم كل ما بجعبتي ان شاء الله تستفيدوا
بالتوفيق اختي نتمنى افدتك
دعواتك اختي رجاءً