السلام عليكم راكي مسافرة واحترت واش تدي معك اكل في الطريق، حبيتي فكرة تاع عشاء خفيف تفضلي جربي هاذ الوصفة لي هي عبارة على كسرة محشية بشكشوكة بصل المقادير استعملت غرفية حليب للكيل 2كيلات سميد كيلة فرينة نصف كيلة زيت ملح ملعقة صغيرة خميرة الخبز للحشو حبة بصل حبة طماطم 2سنينات ثوم ملح، فلفل اسود علبة تونة زيت او طماطم قطعة جبن التحضير نبدا بالحشو نقلي البصل مقطع شرائح في شوية زيت نضيف الثوم الملح والفلفل ثم الطماطم مقطعة ونخلطها تطيب على نار خفيفة نخلط السميد والفرينة ونضيف الملح نبسس بالزيت ثم نضيف الخميرة ونلم بالماء نعجن شوية ونقسم على 6كويرات باش ندير 3خبزات صغار هكذا يجيو ساهلين للطياب نحل كويرة فوق منديل باش نقدر نهزها لانها مبسسة ولازم نحلها رقيقة نوزع فوقها كمية من البصل وشوية تونة وقطع صغيرة من الجبن نحل كويرة ثانية ونغطي بيها ونقفل مليح الاطراف نطيبها في الطاجين على الجهتين ونقدمها ساخنة او باردة بصحتكم