على قد ماتحللها على قد ماتزيد ترفد روحها عليك.
كلما حاولت تتعامل معاها بالحسنى
كلما عفست عليك.
لذا تمنيت لو أنك ماهدرتش معاها
نهائيا لا بالرسائل ولا بغيره.
هي وأهلها غالطين وعائلة لاتصلح
وناس ماعندهمش أصل.
دوائهم هو السكوت عنهم أولا.
وتعفسهم ثانيا.
غلطت كي حللتها
ماشي هذا هو النوع تاع النساء اللي تحللهم.
كاين نساء وعائلاتهم يجو غير بالعصا.
وزوجتك وأهلها من هذا النوع.
وللأسف أنت عاطفي بزاف.
كي حللتها بعثت تطلب الطلاق
لأنها عارفة انك ماطلقهاش.
وزادت قالتلك ولا كنت راجل طلقني.
وهذا عندو معاني كثيرة جدا.
للأسف هي تعرفك مليح .
وتعرف ضعفك.
وأهلها يعرفوكم مليح.
وهذا الشيء اللي داروه مؤشر
واضح على قيمتكم عندهم.
ماتزيدش تذل روحك أكثر من هكذا.
اضرب صدرك راك راجل.
خليها تموت بغيضها.
بدل شريحة التليفون واقطع أي اتصال بها وبعائلتها.
مدام راك فاتح المجال معاها بالكلام. حتى ولاكان التهديد بالطلاق. رح يكون متنفس لها.
اخلطلهم حساباتهم.
وعيش حياتك عادي جدا.
ماتبكيش على إمرأة كاين منها الآلاف.
نفتح قوس لحادثة مشابهة تماما
حدثت عند ناس نعرفوهم بنفس السيناريو تاعك سبحان الله.
هذا ( الرجل) ضربوه إخوة الزوجة في بيته.
ونشروا الشائعات عليه فسدولوا عرضوا
لديه ثلاثة أطفال مدة زواجه 11سنة.
طلبت الخلع وتحصلت عليه.
وهذا ( الرجل) كل يوم يبكي عليها حتى ترجع.
رفض الزواج من أي امرأة أخرى.
بعد سنة من العاصفة.
وبعدما يئست طليقته من الزواج بالشخص الذي كان يوهمها بالزواج.
طلبت ترجع لزوجها المخلوع.
وهو ماصدق أنها رضات عليه.
ورجع ليها وقاطعوه أهله لأنهم رفضوا. بعد كل الإهانات اللي تعرض
ليها. ضربوه خاوتها وطلقاتو هي ورجعاتو هي.
ولى أضحوكة الرجال والنساء.
هذ الحكاية ماشي من نسج خيالي.
هذ الحادثة صرات عند ناس نعرفوهم مليح.
سنة كاملة وهو يبعثلها في صحابو
ويبعثلها في الرسائل على جوالها.
وهي ماشي دايرتلوا أي قيمة.
نتمنى ماتكونش مثل هذا النوع اللي ذكرتلك حكايته.
وبالفعل تحول إلى حكاية ضحكو عليه الرجال والنساء.
ولازال أضحوكة الجميع في المنطقة اللي راه عايش فيها.
نحي من بالك أنه عندما تقطع الاتصال بها يعني راك تغلق طريق الصلح.
بالعكس.
في بعض المرات كي تغلق الأبواب اللي يجي الحل سريعا.
ماتزيدش تهدر معاها.
كلما هدرت معاها وحللتها كلما خسرتها أكثر وأكثر.
هي حبت تبعد عليك .
خليها تروح. وخليها ترتاح منك
رح تعاود تولي ليك إذا ماكانش عندها مشروع زواج.
فكر مليح في الأشياء اللي كتبتهالك.
المعاملة بالطيبة وبالحسنى لما مايكونوش في محلهم يكون هذا دليل على ضعف الشخص.
وإذا عرفوك ضعيف رح يسهل التخلص منك. ومارايحينش يندمو.
لازم توريلهم العين الحمرة عن طريق عدم المبالاة بهم.
ماتعمرش راسك بيهم.
اقطع الاتصال والتواصل
إذا راك حاب ترجعلك زوجتك.
وإذا طلبت الخلع تكون تهنيت من أسرة ماعندهمش أصل.
وبالنسبة لإبنك عندك الحق فيه.
المهم
كون راجل. عطالك الشرع أربعة وعطالك الشرع الطلاق.
ماتضعفش روحك حتى يوليو يتصرفوا فيك ويهددودك بالخلع.
مارانيش نحرض فيك تطلقها.
راني نقولك خلي المسافة بينك وبينها وماتحللهاش وماتحاولش تتصالح معها خليها ترشى في دارهم. حتى تكره وتولي هي اللي تحللك تجي تديها.
كلما اتصلت بها او تواصلت معها كلما أصرت على أنك ماتصلحلهاش.
خليها تحس بالفراغ الذي ينشأ عن غيابك عنها.
مالقيتش وش نزيد نشرحلك أكثر.
رب يوفقك ويصلحلك بيتك.