يا أختي الأمور ماتجيش بطريقة فجائية
كاين الكوارث الطبيعية فقط اللي تجي تقلب الدنيا من حال إلى حال
ومن لحظة للأخرى
لكن في قوانين البشر تكون مقدمات للنتائج اللي نوصلوا ليها
هذا الرجل له حالتين
يا إما كان من الأول بهذا الشكل وكان يستغل فيك حتى يدي وش يسحق ويخرج من الأزمات اللي كان يمر بيهم
وانت ماكنتيش منتبهة ليه ولتصرفاته وصدقتيه
بالتالي هذا خداع وتخدعتي فيه
ماعندك علاه تبكي عليه
يا إما كاين شيء ثاني وهو سحر التفريق
لازم تهدروا معاه يحب ولا يكره
جندي رجال الأسرة تاعك ويروحوا ليه
باش يعرف هو وأهله أنك لست إمرأة رخيصة
ماتسكتيش كيما قلب عليك الدنيا اقلبيها عليه
ماتخليش الأمور في السكات وفي المجهول
إذا كاين من أهله اللي تسبب في هذا الشيء يتفضح أمرهم
وإذا خسرتي الرجل ماتخسريش سمعتك
يولي اللي جا يهدر فيك
قال فلانة شهر قبل العرس طلقها يادرى علاه ؟؟؟؟؟؟؟
كانت تشكر فيه وتقول وليد فاميليا . لو كان جات صالحة مايخليهاش ؟؟؟؟؟؟
هذي أبسط الجمل اللي رايحين يقولوها الناس
وماتقوليش مايهمونيش وش يهدروا
كاين هدرة تاع الناس ماتهمش
وكاين نوع ثاني مهم جدا
وفي حالتك انت مهم جدا دافعي على نفسك
وعامل الزمن عنده دور كبير جدا
ماتخليش الوقت يروح ويبرد الموضوع ويولي في خبر كان
الرسول صلى الله عليه وسلم في حادثة الإفك تاع عائشة
ارفدها لدار باباها قعدت شهرين حتى نزل القرآن بتبرأتها من سبع سماوات. مع أنه صلوات ربي وسلامه عليه بيته بيت الشرف وزوجاته الشريفات العفيفات
من اتقى الشبهات استبرأ لدينه وعرضه
(جزء من ردي في قسم مشكلتي )
ماتسكتيش
وماتستسلميش
وماتزيديش تعاودي كلمة الموت البطيء
لازم تنتفضي
رب يفرج عليك