سلام البنات هادي طريقة الرب أو دبس التمر حبيت نفيدكم بيها وتاني لأختي حياة و حهينة اليقين لي سالت عليه و طريقة الأكل هي تاكليه وحده و هاكداك بارد و الا دفيه شويا والا تحكمي السمن إحنا نديرو مرجان وتخلطيه مع الرب تضربيهم مع بعضاهم وتزيدي لو سمن طبيعي تاع غنمي ولا بقري يمدلو بنة هايلة وطريقة تجيبي التمر كيما لي نخدمو بيه المقروض و ادا لقيتي هاداك الاحمر افضل اغسليه غسلة خفيفة من الغبرة و ديريه في كوكوت وديري عليه الماء بزيادة و خليه يطيب راه يدي وقت حتى زوج سوايع او اكتر كي تفتحي عليه تلقايه تحرحر خلاص تحكمي قدرة بالكسكاس وتحطي سربيتة في الكسكاس و فرغي فيها كل مرة قيس بول من داك التمر و اعصريه مليح و لازم و هو سخون شويا حتان تكملي تم داك الرب لي عصرتيه فالقدرة راه يكون خفيف رجعيه فوق النار حتى يعقد مليح و تقدري تحتفظي بيه فالتلاجة ولا كونجيلاتور في قارورات ان شاءالله نكون شرحتلكم مليح و اي سوال راني هنا حقا و نسيت نقولكم بلي التمر في الأول نحطوه بالنواة تاعو مانفصوهش