[انا هي رزيقة]

المشاركة الأصلية كتبت بواسطة أُمْنِيَةٌ

مبارك عليكم افتتاح الجزء 171 من الكوزينة انا مانيش موالفة نشارك مرة على مرة نطل عليكم اليوم طليت لقيت بريوش الاخت أنا هي رزيقة عجبني حبيت الطريقة ولا رابط الوصفة اذا امكن خاصة كي قلتي درتو في الليل والصباح غير طيبت هاذي تناسبني لانني نربي في بيبي وعندي اولاد يقراو واسمحولي على التطفل واسمحولي اذا ماقدرتش نشارك معاكم

نهارك سعيد اختي امنية و مرحبا بيك معانا في اي وقت حنونة مكانش تكليف بيناتنا و لو ...... خخخخخ اكيد نمدلك الوصفة من عيوني الاثنين حنونة هو فيه حوالي 600 غ فرينة مع كاس حليب دافئ مع بيضتين و بياض بيضة ثالثة ( الصفار خليه بجيه و زيديلو ملعقتين قهوة باه تطلي بيه البريوشات) مع ملح و نصف كاس سكر و ملعقة كبيرة خميرة عجني الكل مليح حوالي 10 دقائق و زيدي في الاخير حوالي 100 غ مرغارين بحرارة الغرفة و زيدي عجني حتى تدخل الزبدة مليح .انا صراحة هذ الخطوة درتها بعجانتي الكهربائية راح تتحصلي على عجينة تلصق .خليها تخمر . هنا كيما قلتلك تقدري تخليه في الفريجدار و هو مغطي ببلاستيك طول الليل و تنوضي شوةي بكري يعني قبل الاولاد بحوالي ساعة او اكثر و تشكلي قرصات صغار و تحشيهم كيما تحبي انا حشيتهم شوكولا و تخليهم يخمرو حوالي 40 دقيقة او اكثر على حساب حرارة كوزنيتك غطيه بسيلوفان ثم قماش سميك باه يعاون على التخمار . و شعلي الفور تاعك بحوالي 10 دقائق مسبقا قبل متحطي البريوش يطيبب و طليه بصفار البيض و حطيه يطيب اومتروحيش بعيد لانو بالخف يطيب و يتحمر اذا كان الفور تاعك مسخن مليح مسبقا حوالي 15 دقيقة .
ايه نسيت في المكونات مذكرتش الفانيلا انا حطيت فيه فانيلا سائلة عطاتني هذاك اللون الاصفر الشباب. و ثاني يمكن تكون كمية الفرينة اقل او اكثر بقليل على حساب النوعية المهم العجينة لازم تجي لاصقة ما بين يديك . و اذا عندك الوقت طبعا تقدري تعجنيها صباح و تخليها تخمر في حرارة الغرفة حوالي ساعة او ساعتين و تشكليها و تخليها تخمر مرة ثانية و تحضر لقهوة لعشية بالصحة و الهنا.