لحم مفور مع روز حبة بحبة
اولا الارز
زوج كيسان روز نغسلو ونحطو في برمة نزيد عليه اربع كيسان ماء ونملح ونص مغرف صغيرة فلفل اسود ونص مغرف صغيرة زنجبيل مرحي ورشة كركم وزوج ورقات رند وزوج مغارف زيت ونحطو يغلي على نار هادئة هاذا لي يطيب ابيض
الارز الاصفر نفس مقادير الارز الابيض يعني زوج كيسان روز واربع كيسان ماء ونملح ونص مغرف صغيرة فلفل اسود ونص مغرف صغيرة زنجبيل ونص مغرف صغيرة كركم ومغرف صغيرة زعفران مرحي ومغرف كبيرة راس الحانوت وزوج ورقات رند وزوج مغارف زيت ونحط الكل على نار هادئة ونخليه حتان يطيب كي يطيب نخلطهم مع بعض ونضيفلهم زوج مغارف كبار زبدة ستار
نذبل لي شومبينيو في الزبدة ونملحهم ورشة فرفل اسود ونرصهم في مول المسكوتة ونحط عليهم الروز ونضغط بلطف ونقلب في صحن التقديم
الصوص المرافقة للروز هي الصوص لي تخرج من اللحم المفور ونزيدلها كاس كرام فراش ونغلي غلوة ونقدمها والتزيين كل وحدة وشطارتها
اللحم المفور على طريقتي
في الميكسور نحط بصلة كبيرة وراس كامل ثوم وزوج طماطمات وربطة معدنوس هاذو لي يترحاو ونرحيهم مليح ونحطهم في صحن غامق ونضيفلهم مغرف كبيرة ملح ومغرف صغيرة فلفل اسود وزوج مغارف زيت وعصرة حبة ليمون ومغرف كبيرة هريسة وزوج مغارف كبار راس الحانوت ونص مغرف كبيرة كسبر مرحي ونص مغرف صغيرة كركم ونص مغرف صغيرة زنجبيل مطحون وزوج مغارف كبار موطارد نخلط مليح ونحط الخلطة على اللحم ونحاول ندخل مليح بيدي نحط السهمات تاع اللحم في اكياس الشواء ونحط ورقة رند في كل سهمة ونغلق الكيس ونخلي اللحم يبات من الاحسن يدخلوه الدواوات يجي روووعة روووعة ونغطي السهمات بالالومينيوم ونعمل ثقبة من فوق في كل كيس على خاطر راح يتنفخ ويهز الكسكاس ههههه ونخلي الكل 4 ساعات يفورو على نار متوسطة راح يطيب على مهلووو. وبالصحة حبيباتي