[عمر الفاروق 27]

صديقي غادي يكون هذا آخر رد لي في موضوعك و اسمحلي غادي نكون صريح معاك
على بالي باللي نيتك طيبة و راك باغي تساعد الناس -الله يجازيك خير- بصح انت اللي معلوماتك غالطة
محدثك مر بكل مراحل الخدمة الوطنية من التسجيل و الفحص عند الانتقاء ثم الاستدعاء و التأجيل لسبب دراسي و إخيرا أداء الخدمة الوطنية و إتمامها و لله الحمد معناها مين نتكلم عن واقع شفته و عشته.
راك تقول باللي الملف الطبي المدني لا يعتد به في الثكنة، راك غالط على طول و الا كيفاش يعرفوا واحد عنده مرض داخلي مثلا السكري و لا الربو و لا أي مرض مزمن عافانا الله و إياكم، في الثكنة و أعني هنا المدرسة ما كانش أطباء اختصاصيين كاين طبيب عام سواء عسكري أو مدني شبيه، مين تجيه حالة كيما هاذي يطلع على الملف و الراديوات و الأدوية و مين يلقى حالة مرضية فعلا ممنوع عليه منعا باتا يديره مؤهل لازم يدريه أنستونس باش تفصل اللجنة الطبية في أمره كيما ذكرت في ردودي السابقة، و مين تكون عاهة خلقية ظاهرة أو حالة مرضية خطيرة يعفوه مباشرة و يسرحوه بدون أي تأخير ,
زيد قلت باللي الجيش عنده الوقت، لا في المدرسة ما عندهمش الوقت عندهم حوالي 15 يوم فقط من أجل الانتقاء و اختيار قائمة التجنيد و تسريح الباقي إما إعفاء طبي أو إرجاء أو إعفاء فائض و ذلك لبداية التربص، تخيل مدرسة كيما الحراش طاقة استيعابها حوالي 300 ضابط احتياطي و يجوها أكثر من ألف ولازم توفير المبيت و الإطعام راهي مصاريف كبيرة و ضغط كبير و مسؤولية أيضا، من مصلحتهم يسرحوا الناس في أقرب وقت ممكن.
خويا عنوان موضوعك راه "أسئلة عن الخدمة الوطنية" معناها متعلق بكل ما يخص الخدمة الوطنية سواء قبل التجنيد أو بعد التجنيد، أنا هكذا فهمته، إذا راك باغيه يتعلق فقط بما قبل التجنيد ديره هكذا في العنوان باش ما تغلطش الناس.
وأخيرا بارك الله فيك و السلام عليكم و رحمة الله و بركاته.