[إلهام07]

البسملة1

مساء الخيرات حبيباتي



هبلني زكازيكو ماحبش يطلق الميكرو جيت نحطلكم وصفة .. لقيت روحي ... أحم أحم .... أنا وهو نتفرجو في ميكي ماوس خخخخخخخ





والله حرت واش من وصفة نزيد نكتب صراحة درت شادي بادي قالي راسي واش من وصفة طلبوها بزاف البطبوطات


طبعا تموتو على القواطيط ... تهزوا الوصفات من ... وجربوهم من ... وتاكلوهم من ... وتروحوا لقسم الريجيم تبكيو من ههههههه





شوفوا ماعنديش الصور نتاع تحضير الخطوات لكن هذا القاطو ساهل وبسيط مايحتاجش شرح وتوضيح وإن شاء الله تنجحوا فيه كامل
نحب نطمنكم انو القاطو هذا خفيف واقتصادي وبنين ويخلاص بسرررررررعة يشبه للجينواز بصح هو القوام نتاعو شوية أثقل منها
ويترمد في صوص الشوكولا والنواد كوكو يجي بنين ويحبوه الكبار والصغار
حنا نديروه منذ حوالي خمسة عشر سنة تقريبا كل عيد يحضر لاخاطر بنين وخفيف يحبوه كامل

تنبيه فقط : هذا القاطو في الصيف مالازمش يطول لانو يترمد في الصوص مايعيشش فترة طويلة بصح ماتخافوش يخلاص بالخف
حبيت نحطهولكم قبل عيد الأضحى لأنو خفيف يناسب العيد من الناحية الهضمية والاقتصادية خخخخخخخ




تفضلو الوصفة وياربي بعد الهرج اللي درتوه عليها ماجربوهاش وتشوفوا :



المقادير للعجينة :

300 غ زبدة ذايبة ( نستعمل ديما مارغارين فلوريال )
300 غ سكر عادي
3 بيضات
16 ملعقة كبيرة حليب سائل
4ملاعق كبيرة عسل
1خميرة حلويات
300 غ فرينة

مانسيتش لا فاني هذي الوصفة مافيهاش جي فيها ريحة العسل بصح إذا حبيتو ممكن تحطو شوية

المقادير لصوص الشوكولا ( الوصفة الأولى القديمة وديما معتمدينها ) :

250 غ زبدة ذايبة ( ديما مستعمل مارغارين فلوريال )
300 سكر ناعم
20 ملعقة كبيرة حليب سائل
4 ملاعق كبيرة كاكاو أسود ( الكاكاو هنا حسب الذوق ممكن تزيدو شوية على حساب نوعية الكاكاو )



كاينة وصفة اخرى لصوص الشوكولا جربتها جديدة وجاتي أسهل وأبن وانتوما ديرو اللي حبيتو في زوج مجربين وناجحين :

2كاس حليب ، 2 م ك كاكاو أسود ، 4 م ك سكر ، 100غ شوكولا سوداء ( ننصحكم تستعملوا شوكولا منى نوار )


تحضير العجينة :

مثل أي جينواز :
- نضرب البيض بالباتور مليح مع السكر والعسل حتى يذوبو مليح ونضيف الزبدة الذايبة ونضرب ثم الحليب السائل ونضرب ثم نضيف الخميرة والفرينة مغربلين ونضرب بالباتوغ حتى تتجانس .
- نفرغها في بلاطو مدهون بالزبدة ومرشوش بالفرينة ( تعرفو الجينواز كي يكون فيها عسل تلصق شوية )
ملاحظة : لهذي الكمية ديما نستعملو صينية الفرن يجي الخليط ماهوش عالي بزاف باش من بعد كي ينتفخ في الفرن ويزبد يشرب الصوص ويترمد مايجيوش الحبات خشان بزاف .
- ندخلها طيب في فرن مسخن مسبقا على 180° مثل أي نوع كيك .. عسوها راهي ماطولش ثم ثم تحمار ( طيبوها من تحت فقط ماتشعلوش من فوق )
- كي طيب نخليها تبرد تماما باش نقطعها .. صغرو القطع من بعد يكبرو المهم جربو حبة ولا زوج وكي تشوفو الحجم كملوا التقطيع



تحضير صوص الشوكولا :

الوصفة الاولى :
نذوب في كاسرول الزبدة مع الكاكاو والسكر ونحرك حتان يذوبو كامل ونخليها تبرد شوية حتى ترجع دافية باش نزيد الحليب وإلا الحليب ممكن يروب حذاري ... نخلط مليح ونستعملو مباشرة

الوصفة الثانية :
في كاسرول نخلط كل المكونات كامل مع بعض بارد في بارد ونحطها على النار حتى تذوب الشوكولا وتشوفوها ثقالت نطفي النار ونخليها تبرد شوية ونستعملها مباشرة ( إذا حسيتوها جارية بزاف زيدو حبات شوكولا ذوبوهم فيها )


التركيب :

- الآن نقطع الكيك قطع صغار ( طبعا نتخلص من الحواشي باش يجيو الحبات متحوفي ونحاول نقطعهم قدقد ماشي حبة صغيرة وحبة كبيرة )

- نغطس بالوحدة في صوص الشوكولا ونقلبها ( نستعمل زوج يدين في كل يد شوكة - يعني فرشيطة -) وماتخليوهاش طول في الصوص يعني نغطس ونجبد مباشرة باش ماتشربش بزاف صوص وإلا تصرالكم كيما النكتة هذي :

تعرفوا النكتة نتاع الراجل اللي راح للقهوة وطلب حبة كرواسون وكاس حليب كي غطس حبة الكرواسون في كاس الحليب شرباتو كامل
عيط للقهواجي قالو اعطيني واحد حليب وشوفها هي ( يقصد حبة الكرواسون ) واش تشرب خخخخخ



- مباشرة منين تقطروها بواسطة الشوك اللي في يديكم من الصوص مباشرة ترمدوها في جوز الهند وتحطو في صينية

- نخلي الحلوة تنشف شوية ومباشرة نديرها في حاويات ورقية ونخبيها في علبة مغلقة

- نحط العلبة في مكان معزول عن أيدي أفراد الأسرة خخخخخ وندير عليها الأشعة مافوق الحمراء في حالة أي محاولة سرقة ههههههه


ههههههههه راني غير نضحك لازم الحلوة هذي تكون في مكان معزول عن الرطوبة وماشي سخون باش ماتفسدش


نسيت نقوللكم راهي زاكية شوية لاباس تقطع انتوما ماتكبروش القطع برك .




أتمنى جربوها وتعجبكم



تحياتي ................... أنا لهلوبة