[سطايفية بكل فخر]

المشاركة الأصلية كتبت بواسطة moulmoul

الله يرضى عليك يارب ....ويبارك فيك وفي الوقت الي راكي تخصصيهولنا...
اليوم رحت عند opticien معروف عندنا هكا باش نجمع اكبر قدر ممكن من المعلومات ولقيتوا متاجاوب معايا ويفهمني ويسمعني ..طبعا قلت لازم نقولك واش قالي لانو انتي المرجع تاعي هههه ومدايرة فيك ثقة كبيرة رغم انو مانعرفكش وهذا من فضل الله الي حببني فيك وارتحتلك حقااا وهذا من طيبتك وطولة البال هههه علينا هبلناك بالأسئلة..
شوفي يا لالا رحت عندو وقلتلوا واش راني حابة بالضبط يعني عدسات يومية وسقساني علاش راني حبتهم وسقساني على نسبة الميوبي تاعي ولستجمااتيزم ولستجماتيزم قالي بلي ناقص 1.25 في العدسات ممكن تجاهله وحذفه قالي بلي كاين عدسات تشبه نوعا ما واش راكي تحوسي قالي الجوتابل ماهومش ديسبونيبل في بلادنا وقالي ماركة مينيكون اليابانية تجي علبة
علبة فيها ستة عدسات يعني ثلاث ازواج قالي تستعمليها لمدة شهر تقدري ترقدي بيها قالي بصح من الاحسن تستعمليها لمدة ستة ايام متواصلة وتنحيها في المحلول تاعها وممبعد نفس الشيء للاسبوع الثاني حتى الاسبوع الرابع وترميها يعني بعد مرور شهر قالي ممبعد تجبدي الزوج الثاني وهكذا يعني ثلاث اشهر قلتلوا والسعر قالي 5000دج .قتلوا وهل هي امنة للنوم قالي مخدومة لداك الشيء قالي العلم طور والمادة للي صنعوا بيها العدسة مصممة خصيصا لمرور الاكسجين اثناء النوم.
وانتي مارأيك فيلي قالواا وهل فعلا يمكن اهمال الاستجماتيزم في حالتي للعدسدسة

اهلا مولمولا وشا راكي اختي
اللهم امين اجمعين
+
هههههه الشرف ليا نكون مرجعكم رغم اني نقطة في بحر العلم الخاص بالبصريات
شكرا لثقتكم فيا
حتى انا والله نحبكم في الله ونعاونكم لوجه الله
كي كنت ندير السطاجات في سبيطارات وعند الطبى وعند ليسزوبتيسيان مرات نروح نبكي على حال المرضى ومرات نروح نبغى نتقيا حشاك ونجي طالعلي المرض في راسي من كثرة التخلاط لي يديروه
ونقول بلي لازم نثقف ونجتهد في المجال باش نعاون خاوتي في الله لانو العينين هوما الحبيبتين كيما قال الرسول صلى الله عليه وسلم
والحمد لله مزال كاينين عباد يخدمو ريقلو وتالمون قلال رانا ولينا نحوسو عليهم بلالوب باش ننصحو بيهم خاوتنا
حنا والاصدقاء تاوعي مدايرين بحث في فائدة المرضى عن احسن الاطباء وليزوبتيسيان وليزوبيطو لي يسمع بواحد يديكلاريه عند خوه باش ننصحوكم بيه
وربي يقدرنا نعاونوكم ودعيولنا ميبدلناش الزمان ونرجعو كيفهم
انش ءالله نبقاو نخدمو ريقلو لوجه ربي
+
كثرت الهدرة ههه نرجعو للمفيد
ايهيه راهو يحكي على لالونتي بريميوpremio toric الله يبارك اونفان كاين واحد يبروبوزيها
والله خلعني صراحة فعلا هي تاع مينيكون ولعلمك مينيكون من احسن الماركات العالمية
وتروج في الجزائر فعلا
+
حبسي حبسي اوخلطلك شعبان في رمضان مسكين يعرف لامارك وميعرفش كيفاش يستعملوها هههه
ظرك نشرحلك كيفاش تندار
اولا قولو يافهيمو منقدروش نتجاهلو استيجماتيزم تاع 1,25 نقدرو نتجاهلو 0,25 حتى 0,50 فوق 0,75 تنحط هذي حاجة
الحاجة الثانية قولو ياسي لوبتيسيان بريميو توريك لونتي تتبدل كل 15 يوم مش كل شهر
" renouvelement bihebdomadaire c'est pas mensuelle"
وثالثا هي متقعدش ثلاث اشهر كيما راهو يقلك
هي تسعمليها على شكلين حسب وشا يصرحلك الطبيب
اما تسعمليهاport prolongé واش معناه هذا انو تركبي لالونتي تاعك ومتنحيهاش الا مرة او اثنين باش تنظفيها لمدة ستة ليالي و7 ايام يعني تباتي بيها 6 ايام فقط وتكملي النهار السابع وطيشيها حذاري تباتي فوق ال6 ايام بيها
يعني ارقدي بيها على روحك واستعمليها في النهار عادي مخصصة لهذا فقط في هذاك الاسبوع نحيها مرة او اثنين نظفيها ورجعيها لعينك
وبالتالي اذا استعملتي هذا البور رايحة تكملي الباك في 21 يوم وليس شهر واول متكملي من وحدة ترمى فورا مش تعاودي تغسليها وترجعيها كيما راهم يقلك هذا الدبدوب
الطريقة الثانية للبس هي port journalier يعني تلبسيها في النهار ومتلبسيهاش في الليل يعني تلبسيها الصباح وفي الليل تنحيها وترقدي طبعا النيتواياج في هذي الحالة يكون يوميا لمدة 15 يوم وتنحيها
وترميها في اليوم 16 متفوتيش 15 يوم
تقدري تقيلي بها
وبهذي الطريقة تحكملك 45 يوم يعني شهر ونص للباك
+
وي سيفري مصنوعة خصيصا لدخول الاوكسيجين للعين
+
وكاينة عندهم ايضا في المينيكون ماركة اسمها miru هذي تاع كل شهر تتبدل وتتلبس غير النهار يعني تلبسيها ثلاثين يوم وترميها
+
المشكل تاعهم انو فيها درجات محددة ومعلاباليش اذا تناسبك او لا
قوليل لاكس تاع الكوراكسيون تاعك وشحال
وشا مكتوبلك في الوصفة هوماي كتبولك -4.50 ويكتبولك -1,25 à ويكتبولك رقم وقدامو درجة مثلا 10° او 150° واش كتبولك بالضبط
+
هذ لالونتي ايضا يخدموها ابن الهيثم
راني دزيتك لاحسن اطباء مختصين في العدسات في الجزائر 48 ولاية يروحو عندهم
غير احكمي رونديفو غاليتي
فقط قالي احد الاعضاء هنا انو لما جا يحكم رونديفو قالولو بلي احتمال تسلك لافيزيت 5000 دج خمسمياتلف لانو يديرو راديو باش يتاكدو من صحة القرنية
باش نعلمك الافونس غايليتي