السلام عليكم اليوم جبتلكم السفنج نتاعي هشوش و خفيف خفييف كالريشة نخليكم مع الصور و لي عودة باه نعطيلكم المقادير و السر اللي خلاه خفيف تفضلو آسفة على التأخير نعطيلكم المقادير : 2 كيلات فرينة +1كيلة دقيق +ملعقة أكل خميرة الخبز +م ك سكر +ملح + ماء دافيء نبلها بالماء و نبدا نعجن و نضيف الماء بالشوية مع العجن المستمر ثم نضيف بيضة و نصف باكي خميرة كيميائية و نكمل العجن حتى تولي العجينة تبرق و لازم تكون مطلوقة ما تكونش ناشفة نغطيها و نخليها تطلع لما يتضاعف الحجم نتاعها نعملها كرابع كيما اللي نديروهم في المحاجب و نخليهم يطلعو مرة ثانية كي يطلعو نجيو نقليوهم و هنا نجيو للسر اللي يخليهم هشوشين و خفاف و السر بكل بساطة هو الماء كي نجي نبسطهم شوية قبل ما نقليهم ندهن الرخامة بشوية ماء نحط فوقها العجينة و نبسطها شوية بالماء ثم نقليها مباشرة بالطريقة المعتادة و الله النتيجة مذهلة أنا كنت في وقت فات نبسطها بالزيت كان يجي خفيف لكن ماشي كيما هذا فهذا خفتو خيالية وخير دليل التجربة اللي حابة تتأكد ما عليها غير تجربو و أي سؤال راني في الخدمة ..دمتم في رعاية الله و حفظه عن قـــــــرب و هذا من الداخل شوفو شحال هشوش و مخرق في أمان الله ..لي عودة إن شاء الله