تلبية لطلب الأخت رقة الزمان في طلبها لوصفة كفتة الدجاج وتعرف أيضا بطجين المشماش والمقادير كالتالي:
صدر دجاج+بصلة مرحية و2 سنات ثوم +ملح وفلفل أبيض+مغرف كبيرة زبدة وشوية ماء حطيهم في الطنجرة وخليهم يتقلاو مليح ثم أمرقي بالماء قيس ما تغطي الدجاج وخليه يطيب أنا هنا درت نص صدر وكويسة
كي طيب الدجاج نحيه من المرقة وخليها تكمل طيب على نار هادئة حتى تخثار
خذي الدجاج حطيه في الروبو وديري معاه كمية من المعدنوس وأرحيه
تتحصلي على خليط ضفيلوا البيض بالشوية وأعجنيه ما تجريهاش بزاف غير قيس ما تكوريها كعبريها دوائر ثم أقليها
بعد ما تكمليها لوحيها في لاصوص تغلي شوية برك باه تطرى شوية لأن معروف عن الصدر أنه شايح ثم قدميها في الصحن وزينيها بازيتون أخضر مغلي والفطر تقليه في شوية زبدة وفلفل أبيض وشرائح من القارص
أنا ما درتش الزيتون راجلي ما يحبوش والباقي ما توفرش عندي
تقدري ديري شوية فرماج في الكعابر عليها تتسمى طجين المشماش جربوها وماكومش راح تندموا خاصة للضيوف