بسم الله الرحمان الرحيم الصلاة والسلام على رسول الله صلى الله عليه وسلم اليوم و بعد معركة كبيرة مع الكرواسون راهو صدقلي البارح شفتو في قناة بنة أيا درتو و خرج رووووووعة قاتلي ختي خلاص من اليوم ناكلو غير من يديك المقادير: 500غ فرينة ملعقة صغيرة ملح ملعقة كبيرة خمارة الخبز فانيلا 2 ملاعق كبار سكر عادي 2 بيضات 50غ زيت ما يعادل فنجان حليب تلمي بيه 250غ زبدة توريق خلطي الفرينة و الخمارة و الملح و الفانيلا و السكر و البيض مع بعض ضربيهم شوية من بعد فرغي الزيت و ابقاي تخلطي ثم كبي الحليب بشوية حتى تتلم العجينة أنا خليتها طرية ثم حلي العجينة شوية و حطي فالوسط زبدة التوريق و بلعي عليها ثم ابداي تطوي فيها أنا مخليتهاش رتاحت درت خمسة تطبيقات ثم حليتها و قطعتها كي تشكلي الكرواسون حطيه في سنيوة و اطليه بالبيض ثم خليه يخمر أنا دالي ساعتين خمور ثم سخني الفرن مليح و دخليه يطيب على نار متوسطة حتى يحمار أنا مشعلتلوش قاع من فوق طاب غير على النار التحتانية نخليكم مع الصور و كاش سؤال راني هنا اصبرو الصور نطول باش نحطهم التحميل ثقيل هذي هنا كي خمر بعد ساعتين هذي كي طاب اممممممممم واش نقول شوفو الحبة كيفاه دايرة و هذا الصحن لكن نهديلكم نجاحي فالكرواسون اللي هبلني غير جربوه راهو هاااااااايل شفتو شحال شباب هاهو خرج كيما اللي يتباع و خفيف قطن أيا خفو جربوه و الله مراح تندمو عليه سلااااااااااااام