تحلية رائعة بعصير الخوخ السلام عليكم حبيباتي اليوم جبتلكم تحلية رائعة من مطبخي ذوقها رائع و منعشة و تنحي السخانة و تبرد العطش تأخذي عصير الخوخ (عصير رامي ذوق خوخ) حوالي نصف لتر و تزيدي السكر حسب الذوق (للأمانة أنا ما زدتش السكر جاني حلو العصير) و تزيدي 02 ملاعق نشاء (إذا تحبي تجيك عاقدة بزاف زيدي النشاء نص ولا مغرف كاملة) و تخلطي كلش بارد بالخلاط اليدوي و تحطيه على نار متوسطة و تخلطي حتى يخثار الخليط و يصبح كالكريمة ضعيه في أكواب تكوني قصيتي فيها شوية فواكه (أنا استعملت الخوخ المعلب) و حطيه في الثلاجة يبرد مليح و اذا حبيتي تقلبيه و تزينيه بأي شيء متوفر عندك مكسرات أو فواكه ان شاء الله تجربوها و الله ذوقها رائع جدا و تصلح خاصة مع سهرات رمضان