البركوكس بالعصبان لليزابيل الوصفة : في قدر او كوكوطة نحط شوية زيت و حبة بصل كبيرة مقطعة و رااس ثووم كبير و طرف لحم تااع جااج او غنميي ،، انا اليووم درت تااع الجااج ،، و نتبلهم بالملح و الفلفل الاسود و الفلفل الاحمر الحلو ،، لي يبغي الحاار يحط الفلفل الاحمر الحاار ،، و عوود كبير قرفة و الاهم رااس الحانووت ،، و نقلي على ناار هاادية ،، نقدر نضيف قطعة تاع شحم غااوي انا ماادرتش بصح مواالفة نديره و يطلق بنة رهيييبة ههه ،، و نضييف زوج حباات طماطم مقطعيين و ملعقة كبييرة و نصف طمااطم مصبرة و عصبااانة كبييرة و ربطة كبييرة قصبر و نخلي الكل يتقلى و من بعد نمرق بكااس ماء و نخلي المكوناات يطلقوو البنة ،، ثم نضيف زووج حباات زروودية و حبة لفت و حبة بطاطا مقطعييين و نمرق بالماء سخووون و نقفل الطوطوطة و نطيب المرق على ناار متوسطة طريقة تحضيير العصباان : بعد ما ننقي الدواارة مليييح مليييح و نكرط الكرشة ننحي منها اكيااس لي نعمر فيهم العصباان ،، انا طريقتي ساااهلة و ما تدييش بوااف الوقت نغلي كل المكوناات ماعدا الاكيااس لي نعمرهم ،، و من بعد نقرهم مليييح و نقطعهم بالمووس قطع متوسة و نحطهم فالروبو و نطحنهم ،، ادا الكمية كبيرة نقسمها على مرتيين ،، و نحط الكل في وعااء غاامق و نضييف الفلفل الاسود و الفلفل الاحمر و رااس الحاانوت و الملح و كمشة رووز و نصف ملعقة صغييرة كموون راح يطلق بنة تهبببل بدوون ما تباان البنة تااعه ،، و طبعاا بصلة متوسطة و فصوص ثووم نكثر مقطعيين قطع رقيييييقة و ربطة معدنووس و ربطة قصبر مقطعيين و نخلط الكل بالملعقة و نبدا نعمر الكرشة لي خليتهاا و نخيطهاا نقدر نطيبهم في نفس اليووم او نخبيهم في المجمد و نهار لي نحتااجهم نجبدهم و نطيبهم مبااشرة بدوون ما نديكونجليهم كييما درت اناا نولي لتحضيير البركووكس هههه ،، بعد ما يطييب اللحم و العصباان و الحمص لانهم هادو هوماا لي يدوو اكبر وقت فالطيااب ،، ننحي الكوكوطة من فوق الناار و نصفيي المرق و نديير اللحم و العصباان و الحمص على جهة و ننحي عوود القرفة و ربطة القصبر و نفوت الخضاار فالكسكااس او نقدر نرحيهم ،، انا كل مرة و كيفااش نديير نرجع المرق في قدر و نزيد عليه الما اللازم و ندووق وااش يخصه نزييد كييما الملح و الطمااطم المصبرة و ما ننسااش رااس الحانووت و ربطة اخرى تاع قصبر ،، نخليه يغلي و نرمي فيه البركووكس لي كنت غسلته و قطرته و فورته من قبل ،، نفوره غير خطرة بدوون اضاافة المااء مشي كيما الطعاام ،، و نخليه يطييب مع التحرييك مرة على مرة بااش ما يلصققش ،، و ميين يقرب يطييب نضيفله الدرسة لي هي فصووص ثووم مرووسيين مع قصبر و معدنووس مقطعيين ،، كمية قلييلة برك ،، و نخليه يغلي غلية ولا زووج و نطفيي ملااحظة : قبل ما نرمي البركووكس يطييب ننحي شوية مرق و نحتفظ بييه في كاسروول خااطرش نحتااجه في حاالة ما ادا نشفلي المرق قبل التقدييم ،، و نقدمه مشبح من فووق بقطع اللحم و العصباان و ممممممم شهية طيبة