عصرت مخي باش تفكرت اليومين الاولين كنا ناكلوا مع دارهم ما خلاونيش نطيب، واحد العشيا سمعت العجوزة تقول للبنات نوضو طيبو العشاء وحدة ما حبت تنوض كامل طايحين مع المسلسلات، فهمت روحي و قلت نطلع نطيب عشايا على روحي ، طلعت و واش صبت حاظر طيبت درت تشكشوكة تاع بصل و طوماطيش و طرشي بالبيض ، العجوزة قاتلي علاش طيبتي تاكلو معانا ؟ أنا كي كملت هبطت عشايا و كلينا كيف كيف هذيك الدقيقة ما علقتليش على التشكشوكة حتى جاز وقت باش قاتلي جات بنينة . تسما أول حاجة كلاها راجلي بعد العرس هي التشكشوكة و قبل العرس نهار داولي الجهاز بعتلو مع خياتي المحاجب.
مور التشكشوكة نهار وحداخر درت المحاجب لكامل الدار تعشاو و من داك الغدوا درتلهم باذنجال غراتان و من داك الغدوا درت بسبوسة بالبيسكوت و اللوز و طيبت لاتاي و طلعو مور العشاء كلاوها عندي
مع الاول قلت لراجلي نديرلهم عرضة بصح هوما بزاااااف في غاشي و يكلفو و حنا مور العرس كنا نسنترو علابيها جاتني الفكرة تاع المحاجب من داك الغدوا قالي إذا طيبينا نتيا تان قلتلو لمن للدار كامل ؟ قالي إيه / قلتلوا إيه اليوم مادام قلتلي نطيبو للدار كامل بصح خلاص ما لازمش نطيح خشينة كل يوم عرضة و نهار ما نقدرش يقولو تبدلت ؟ قالي صح عندك الحق .
بصح أنا ناس داري تحتي ماشي بعاد عليا كل ما نطيب كاش حاجة مليحة و لا كاش حاجة تاع العجين نبعتلها لعجوزتي ننويها صدقة تدف علينا البلاء ان شاء الله.