السلام عليكم
اخي انا التحقت بهذه الثكنة العام الماضي دفعة مارس و حصلت على الإعفاء بسبب طبي
المهم المدرسة رائعة ناس حضارة متربيين
انصحك بالإلتحاق المبكر يعني دير روطار نتاع يومين و لا 3 لاخاطر البلايص قلال تشد 300 يعني كاين 300 سرير برك
باش ما تسوفريش و تروح للقيطون
الماكلة عيانة شوية ما هيش كيما نتاع الدار اصبر و كاين مقهى يفتح الصباح حتى 7 و يفتح لعشية على 16.30
الصباح تنوضو على 5 تروحو تفطرو حليب بالقهوة و الخبز
تحية العلم على الساعة 7 و ربع
ومن بعد الكرفي يعنى تسياق الشالي و تنظيف الساحة حتى 9
ومن بعد يا ترقد يا تقرا كتاب دير وش حبيت حتى 12 الغداء و من بعد الرقاد حتى 16.30 روح للقهوة كشما ماتشري 18.00 العشاء
و كي تكملو العشاء كاين الروسومبلومون يحسبوكم و كي يخص واحد يبداو يعيطو عليكم
و من بعد دير وش حبيت ترقد و لا ديمينو و تقسر دبر راسك المهم الحس ماكانش
و هكذا يوميا
الهاتف المحمول غير ممنوع بصح لكان فيه كام خبيه برك ما تخليهمش يشوفوك
الفحص تفوتو النهار الثاني لكان ما لحقتش بكري في اليوم الأول
و لكان شافو بلي راك مريض تزيد تفوت للبليدة تجوز فحص وحد اخر حسب الحالة عظام و لا عيون ....
نورمالمو ما طولش لكان كنت مريض 8 ايام و تروح
المواصلات باش تلحق لللمدرسة كي تلحق للخروبة محطة المسافرين هز حضري ب 300 دج يوصلك
و لا روح في البيس نتاع محطة بومعطي في الحراش تسلك 20 دج برك كي تخرج من المحطة جوز عل الباسرور راك تلقاى اري ثم
كي يلحق البيس راهو يعيط على بومعطي
اما بخصوص الفائض دخل للمدرسة 1700 واحد حكمو 300 و 300 دارولهم ميتاسيون هذي الحاجة لدوختني يعني شدو 600
و الباقي بين فائض لكبار السن و المتزوجين و الإعفاء للمرضى و السورسي ل 6 اشهر للبغض الأخر
كشما ما خص حبيبي سقسي راني هنا
وربي يفرج عليكم ان شاء الله