صباح النور اختي شوفي انا نقولك طريقتي
انا مزوجة عندي 25 سنة و راجلي 29 سنة هو اللي راه خدام انا مازال
ما عندناش ذراري و المصروف تاع الدار انا المستكلفة بيه و الحمد الله هاد الساعة مستورين
احنا ساكنين في العاصمة و راجلي يخلص ربعة ملاين في الشهر بصح دايما دايرين في راسنا بلي يخلص تلاتة فقط و ميزانيتنا هي تلات ملايين المليون الرابع توفير ما يتحسبش.
كي تدخل الشهرية اول حاجة ننحي مليون نقضي قضيان الشهر رافيتايمة كيما القهوة و السكر و الفرينة و الزيت دايما نشري الحجم الكبير و مسحوق الماشينة نشري تاع خمسة كيلو باش يشدلي شهرين، كي نشري حجم كبير متلا الفرينة نشري خمسة كيلو نوفر خير من كل مرة نشري كيلو و تانيا راني قاعدة في الدار هاد الساعة ندير القاطو خير ما نشروه من برة و هادا توفير و تاكلي حاجة نظيفة و تتعلمي السكر متلا خمسة كيلو يحكمولي تقريبا شهرين ايضا...هاد المليون تاع القضيان داخلين فيه حتى الكوسميتيك ديالي ديودورن شمبوان ماسك تاع الشعر الويز و نشري ايضا شوية لحم مرحي و شوية دجاج.
كل اول شهر انا و راجلي نتعشاو برة الدار هادي من باب التغيير بصح ماشي كل يوم لاني دايرة يوم الأربعاء هو يوم خاص بالساندوتشات و الكاسكروطات و البيتزا و كلش نديرو في البيت حتى الخبز...ساعات في اخر الشهر يبقي مصروف نروحو لسينما 7D فقط نغيرو الجو.
يبقي مصروف الفواتير و النت هادوك 7000دج لان النت اللي درتو غالي (المنطقة اللي راني ساكنة فيها مازال ما داروش الهاتف الثابت يعني شريت مودام ويفي 4g نخلص 3500دج شهريا) بصح كي يدخلو الفيكس نحيه بزاف عليا
نجو للملابس الصراحة انا ما نخرجش بزاف و عندي عامين زواج يعني مازال نلبس من جهازي و مزال ما لقيتش خدمة نقول نفضل راجلي يلبس لخاطر هو اللي راه يخرج للناس كل يوم و ان شاء الله كي نبدا نخدم نشري شوية حوايج تاع الخرجة باش نبدل بيهم
الخضر و الفواكه نشري بالأسبوع لخاطر بلخف تخسر الحاجة و كيما الان الكابوية شرالي بابا واحدة نقيتها و قطعتها و درتها في المجمد و نجبد بالشوية
و هكدا ندير مع الخضر الموسمية
حاولت نعطيك كل التفاصيل الممكنة باش تكون عندك فكرة شاملة لانه الاقتصاد و التوفير في الميزانية يبدا من هاد التفاصيل الصغيرة
ربي يعاون و يبارك الرزق يا رزاق يا عليم