[أم عروة]

اخواتي هذه احدى وصفاتي في طبخ الارز، في الغالب نطيبوه بلاصوص حمرا مي هاد المرة راه بلا صوص بلونش والله رووووعة بنين بزاف وما يتشبعش
نخليكم مع المقادير

نجيبو كمية من الارز حسب الحاجة نغلوه فالماء وملح وكركم





حتى قريب يطيب، حاولو ما تخلوهش يطيب كامل باسكو نزيدو نفوروه شوية حتى يستوي طيابو
التفوار يخليه يجي خفيف ومزربع مشتت ماشي معجن

نجيبو سمك موسى sole ناخدو ثنين او ثلاثة حسب الحاجة انا هنا درت ثنين





بعدما يديكونجلا نقطعوه مربعات صغيرة ونخلوه جانبا

نحطو مقلاة فوق النار نديرو فيها شوية مارغارين وشوية زيت، كي تسخن نضيفولها نصف حبة بصل مقطعة مربعات صغيرة



حتى تتقلى مليح وتاخذ اللون الذهبي



نضيفولها السمك المقطع ونقليو ومنبعد نزيدو شوية ملح وشوية فلفل اسود، راس الحانوت، كركم، خليط الدجاج يجي رووووعة
ونقليو على نار هادية،
نضيفو كمية من لاكريم فراش


وفرماج ابيض ومبشور اذا توفر ويمكن الاستغناء عنه





نضيفو شوية ماء ساخن
وهاهي لاصوص بدات تستوي



وهاهي بعدما طابت



ويقدم حسب الذوق

>>انا هنا كنت مزروبة ماشبحتش هههه





طبعا انا درت حق شخصين
وهاديك دانينو لي راهي تبان تاع وليدي لي راهو يسلم عليكم خخخخخ

نتمنى عجبتكم الوصفة مالغري علابالي بلي كاين بزاف يعرفوها ويتفننو فيها خير مني طبعا انا هنا باش نتعلم مانظنش اني نعلم مع العمالقة ماشاء الله
ربي يحفظكم اخوااااتي