البسملة1 السلام عليكم عزيزاتي ان شاء الله راكم لاباس جبت لكم تحلية عبارة عن معجون الطباسا او سلمون في بعض المناطق وهي عبارة عن وصفة قديمة كانو يحضروها ناس زمان الجديد لفيها التغيير في الشكل مع العصرنة و ان شاء الله اجربوها وتعجبكم معجون الطباسى: خذي السفرجل اغسليه و قشريه و نقيه من النواة حكيه بالقارس ة قطعيه و فوريه . كيطرى ارحيه بالميكسور و لي معندهاش دير الرحايا اليدوية من الجهة الرقيقة. امبعد عبري 1كيلة سفرجل بيري ب 2كيلات سكر حجرة و لي معندهاش دير سكر عادي و لكن الحجرة احسن و ديريهم في اناء و غطيه و ديريه يبات في الثلاجة حتى يذوب السكر . غدوى منذاك فرغي الخليط في كوكوت ثقيلة على نار متوسطة مع التحريك بدون انقطاع بواسطة ملعقة خشب حتى تجمد و يبدا الخليط ينفك من قاغ الكوكت . فرغيها في ليمول تع سيلسكون مدهونين او في صينية مدهونة و اتركيها لمدة من 3 الى 4 ايام . انزعيها من ليمول مرريها في سكر ممزوج بكيسين فانيليا نوارة و عمري الثقوب بلجولي تاع السفرجل . و الى في الصينية قطعيها مربعات او مقروطات و مرريها في السكر و الفانيليا كذلك . لاجولي: غلي البذور و قشور السفرجل مدة 20 الى 25 دقيقة . بعدها صفيه و عبري كاس ماء مصفى مع كاس سكر و عصير الليمون على نار حركي شوية في الاول باه يذوب السكر خليه حتى يثقل و يرجع للنصف طفي و كيبرد ضعيه في بلارة في امان الله